Soulmates Part 6 പിറ്റേന്ന് രാവിലെ ഭൂമി കണ്ണുതുറന്നത് ജനാലയിലൂടെ അരിച്ചെത്തിയ ഇളം വെയിലിലേക്കാണ്. അമ്മ എപ്പഴോ എഴുന്നേറ്റു പോയിരുന്നു. അവൾ പതിയെ എഴുന്നേറ്റിരുന്നു. അഴിഞ്ഞു കിടന്ന തന്റെ നീണ്ട മുടി ഉച്ചിയിൽ വാരികെട്ടി അവൾ കട്ടിലിൽ നിന്നെഴുന്നേറ്റു. ഇടാനുള്ള ഡ്രെസ്സും ടവലും എടുത്ത് ബാത്‌റൂമിൽ കയറി. തണുത്ത വെള്ളം അവളുടെ ശരീരത്തെ മാത്രമല്ല. മനസ്സിനെയും തണുപ്പിച്ചു കൊണ്ടിരുന്നു. കണ്ണടച്ച് ഷവറിനു ചുവട്ടിൽ നിൽക്കുമ്പോൾ അവളുടെ ഉള്ളിൽ മുകിലിന്റെ രൂപം തെളിഞ്ഞു. തന്റെ കുടകീഴിൽ തന്നെ നോക്കി ചിരിച്ചു കൊണ്ട് എന്താ എന്ന് പുരികം പൊക്കി ചോദിക്കുന്നവൻ. ഒരു പെരുമഴയത്ത് എങ്ങുനിന്നോ വന്ന് മനസ്സിൽ കുടിയിരുന്നവൻ. കുളി കഴിഞ്ഞിറങ്ങി അവൾ തനിക്കിഷ്ടപ്പെട്ട പീച് കളർ മിഡിയും ഡാർക്ക്‌ ബ്ലൂ ഫുൾ സ്ലീവ് ട്യൂണിക് ടോപ്പും എടുത്തിട്ടു. മുടിയിലെ വെള്ളം തട്ടികളഞ്ഞ് ടവൽ ഹാങ്കറിൽ വിരിച്ചിട്ട് അവൾ താഴെക്കിറങ്ങി. "എന്താ അമ്മേ കഴിക്കാൻ " അടുക്കളയിൽ എത്തിയ പാടെ അവൾ രേണുകയോട് ചോദിച്ചു. "അപ്പം ഉണ്ട്. മുട്ടക്കറി ഉണ്ട്, വെജിറ്റബിൾ സ്റ്റൂ ആവുന്നേ ഉള്ളൂ..." "മ്മ്മ്.. ഞാൻ സഹായിക്കാം " "ഇതിലിനി സഹായിക്കാൻ ഒന്നുല്ല. ഇതൊന്ന് കടുക് വറുക്കാനേ ഉള്ളൂ... നീയാ പാത്രങ്ങൾ ഒക്കെ എടുത്ത് വെച്ചോ..." "ആ അമ്മാ..'' കഴിക്കാനുള്ളതും വിളമ്പാനുള്ളതും ഒക്കെ അവൾ ടേബിളിൽ എടുത്തു വെച്ചു.  രണ്ടു കപ്പ്‌ ചായയുമായി രേണുകയും വന്നിരുന്നു. കാസറോളിൽ നിന്ന് അപ്പം എടുത്ത് തന്റെ പാത്രത്തിൽ ഇട്ട് അവരത് ഭൂമിക്ക് മുന്നിലേക്ക് നീക്കി വെച്ചു. "അയ്യോ കഴിക്കല്ലേ " ശബ്ദം കേട്ട് അവർ രണ്ടു പേരും വാതിലിന്റെ ഭാഗത്തേക്ക് നോക്കി. അവിടെ ചിരിച്ചു കൊണ്ട് നിൽക്കുകയായിരുന്നു താര. അവൾ കുളിച്ചൊരുങ്ങി പുതിയ ഡ്രസ്സ്‌ ഒക്കെ ഇട്ട് എവിടെയോ പോവാൻ നിൽക്കുകയാണ്. മറൂൺ കളർ സിമ്പിൾ ഗൗൺ ആയിരുന്നു അവളുടെ വേഷം. ഷാൾ കഴുത്തിലൂടെ ഇട്ടിട്ടുണ്ട്. "ആ മോളെ, വാ നീയും വന്നിരിക്ക് " "ഇല്ലമ്മാ... അമ്പലത്തിൽ പോണം. അതിനിവളെ വിളിക്കാൻ വന്നതാ.. ഇന്ന് അച്ഛമ്മയുടെ പിറന്നാൾ ആണ്. വഴിപാട് കഴിപ്പിക്കാൻ ഉണ്ടെന്ന് പറഞ്ഞു അമ്മ. ഞങ്ങൾ വേഗം പോയിട്ട് വരാം." താരയോടൊപ്പം രേണുവും പ്രതീക്ഷയോടെ ഭൂമിയെ നോക്കി. "കുളിയൊക്കെ കഴിഞ്ഞതല്ലേ... പോയിട്ട് വാ നീ " രേണുക പറഞ്ഞു "ഞാൻ റെഡി ആയിട്ട് വരാം. " ഭൂമി എഴുന്നേറ്റു. രേണുക കാസറോൾ മൂടി വെച്ച് തന്റെ പാത്രത്തിൽ വെജിറ്റബിൾ കറി ഒഴിച്ച് കഴിക്കാൻ തുടങ്ങി. "മൊട്ടക്കറി ഇല്ലേ..." പാത്രങ്ങളൊക്കെ തുറന്നു നോക്കിക്കൊണ്ട് താര ചോദിച്ചു. "ആ ഉണ്ടല്ലോ. " "അപ്പോ വന്നിട്ട് ഇവിടന്ന് കഴിക്കാം. അവിടെ ഇഡ്ഡലിം സാമ്പാറും ആണ്. ഇഡ്ഡലിക്കൊക്കെ നല്ല മട്ടൻ കറി വേണം. അമ്മക്ക് ആ കോമ്പോ അറിയില്ല. നിങ്ങൾ രണ്ടു പേരും ഒരേ വയറ്റിൽ അല്ലെ കിടന്നത്. എന്നിട്ട് രേണു അമ്മേടെ അത്ര കൈപ്പുണ്യം ഒന്നും എന്റമ്മക്ക് കിട്ടീട്ടില്ലലോ.... " "അവൾക്ക് പാചകത്തേക്കാൾ കൂടുതൽ വാചകത്തിൽ ആണ് കഴിവ്. എനിക്കാ കഴിവ് കിട്ടിയിട്ടില്ല. " "ആണല്ലേ..." അവർ ഒന്നിച്ചു ചിരിച്ചു. "എടി ഭൂമി.. നീ കഴിഞ്ഞ ക്രിസ്തുമസിന് എടുത്ത വൈറ്റ് ചുരിദാർ ഇട്ടോ... ഇതിന്റെ ഒപ്പം എടുത്തത് ഇട്ട് യൂണിഫോം ആക്കല്ലേ..." എന്തോ ഓർത്തിട്ടെന്ന പോലെ താര വിളിച്ചു പറഞ്ഞു. അതേ സമയം താര ഇടേണ്ടെന്ന് പറഞ്ഞ ഒരു പോലുള്ള ഡ്രസ്സ്‌ ആയിരുന്നു ഭൂമിയുടെ കയ്യിൽ. അവൾ അതൊരു പുഞ്ചിരിയോടെ അലമാരയിലേക്ക് തന്നെ വെച്ച്  കഴുത്തിൽ മുത്തു പതിപ്പിച്ച വെള്ള ചുരിദാർ എടുത്തു. ഒരുങ്ങി ഇറങ്ങിയ ഭൂമിയെ കണ്ടപ്പോൾ താര അവളുടെ ചുറ്റും നടന്നൊന്ന് നോക്കി. "ഓക്കേ... എന്റത്ര പോരാ.. എന്നാലും കൊഴപ്പല്ല." "നീ നന്നായി ഒരുങ്ങിട്ടുണ്ടല്ലോ. അത് മതി. വരുന്നെങ്കിൽ വാ " "അപ്പോ രേണുമ്മാ ഞങ്ങൾ പോയിട്ട് വരാം." രേണുക അപ്പോളേക്ക് ഭക്ഷണം കഴിച്ച് കൈ കഴുകുകയായിരുന്നു. കണ്ണാടിയിൽ നോക്കി കൊണ്ട് അവർ മറുപടി പറഞ്ഞു. "പോയി വാ മക്കളെ " അമ്പലത്തിലേക്ക് കുറച്ചു ദൂരമുള്ളത് കൊണ്ട് താര സ്കൂട്ടി എടുത്തു. അമ്പലത്തിലെ തണുപ്പും ചന്ദനഗന്ധവും മനസ്സിന് അല്പം ആശ്വാസം നൽകിയെങ്കിലും, തൊഴുതിറങ്ങിയ ഭൂമി കണ്ടത് കൽപടവുകൾക്ക് താഴെ നിൽക്കുന്ന മുകിലിനെയാണ്. ഇന്നലത്തെ നിമിഷങ്ങൾ അവളുടെ ഉള്ളിൽ തിരതല്ലി. പക്ഷേ, അവനെ കണ്ടില്ലെന്ന് നടിക്കാൻ അവൾ തീരുമാനിച്ചു. തന്റെ ഹൃദയമിടിപ്പ് അവൻ കേൾക്കുമോ എന്ന ഭയത്താൽ അവൾ മുഖം കുനിച്ചു. താര അവനെ കണ്ടില്ലായിരുന്നു. ഭൂമി പടിക്കെട്ടിനു മുകളിൽ ഇറങ്ങാതെ നിൽക്കുന്നത് കണ്ടിട്ടാണ് താരയും അങ്ങോട്ട് ശ്രദ്ധിച്ചത്.  മുകിലിനെ നോക്കാൻ അവൾക്കെന്തോ മടി തോന്നി. അവരിരുവരും തന്നെ കണ്ടിട്ടാണ് ഇറങ്ങി വരാത്തതെന്ന് കണ്ട് അവന്റെ മുഖം മങ്ങി. മുകിൽ മുകളിലേക്ക് കയറി.  മുകിൽ അടുത്ത് വരുംതോറും താരയെക്കാൾ വെപ്രാളം ഭൂമിക്കായിരുന്നു. താരയേക്കാൾ വേഗത്തിൽ അവൾ പടവുകൾ ഇറങ്ങി. മുകിൽ പിന്നെയവരെ നോക്കിയില്ല. മുന്നോട്ട് നടന്നു. തന്നെ മറി കടന്നവൻ പോയപ്പോൾ താര വെറുതെ ഒന്നു തിരിഞ്ഞു നോക്കി. പക്ഷെ, അവൻ നോക്കിയില്ല. പെട്ടെന്നായിരുന്നു അത് സംഭവിച്ചത്. "ആ...." ശബ്ദം കേട്ടിടത്തേക്ക് എല്ലാവരും നോക്കി. നനഞ്ഞ കൽപടവിൽ കാൽ തെറ്റി നിലത്തു വീണുകിടക്കുകയാണ് ഭൂമി. "ഭൂമീ....." താരയും മുകിലും ഒരേ സ്വരത്തിൽ വിളിച്ചു. ✍🏻asra #📙 നോവൽ #👩 Sisters Love #💞 പ്രണയകഥകൾ #😍 ആദ്യ പ്രണയം #❤ സ്നേഹം മാത്രം 🤗