ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/mljBnP10?d=n&ui=v64j8rk&e1=c#ബൊമ്മലാട്ടം S2 ((EP05)) ഉയർത്തെഴുന്നേറ്റു വന്ന ആ മത്സ്യകന്യക ശാന്തമായി കടൽ തിരമാലകളെണ്ണിയിരുന്നു. തന്‍റെ കൊട്ടാരത്തില്‍ നിന്നും ഭൂമിയിലേക്കിറങ്ങി വന്ന റാണിയെ സന്തോഷിപ്പിക്കാന്‍ തിരമാലകള്‍ കുസൃതിയോടെ വീണ്ടും വീണ്ടും ഉയര്‍ന്നടിച്ച് കുട്ടികളോടൊത്ത് സല്ലപിച്ചു. അതിലെല്ലാം അവള്‍ മന്ദഹസിച്ചിരിക്കുമ്പോള്‍ ഡിക്സന്‍ കോബ അവളില്‍ തറഞ്ഞിരിക്കുകയായിരുന്നു. കടലടിത്തട്ടിലെ കൊട്ടാരവും പ്രജകളുമെല്ലാം മുന്നില്‍ കാണുന്ന തിരമാലകളെ പോലെ ഉള്ളില്‍ മഥിച്ചു കളിക്കുന്നു. ഇവളാരാണ്?! ശരിക്കും ഇവളൊരു മത്സ്യകന്യകയാണോ? എങ്കില്‍ മത്സ്യത്തിന്‍റേതു പോലെയുള്ള വാലെവിടെ? ചിതമ്പലുകള്‍ എവിടെ? എപ്പോഴും കൊണ്ടു നടക്കുന്ന ത്രിശൂല കുന്തമെവിടെ??!! എല്ലാം കടലിന്‍റെ കോണില്‍ എവിടോ ഒളിപ്പിച്ച് അവള്‍ ഭൂമിയിലേക്കിറങ്ങി വന്നതാണ്. മനുഷ്യരെ കാണാന്‍. അവരോടൊത്ത് ചിലവഴിക്കാന്‍. ആരുമറിയാതെ തിരിച്ച് കൊട്ടാരത്തില്‍ പോകാന്‍. കോബയുടെ ചിന്തകള്‍ മോറീസ് ബൈനോക്കുലര്‍ വഴി ഒപ്പിയെടുത്തു. "ബോസ്സ് എന്താ ആ പെണ്‍കുട്ടിയെ ഇങ്ങനെ നോക്കുന്നത്?!" അയാള്‍ ഭ്രമിച്ച് നിന്നു. "എന്താണ് ബോസ്സിന്‍റെ ഉദ്ധേശം?! ജുവാനയുടെ വേര്‍പാടിനു ശേഷം ഒരു പെണ്‍കുട്ടിയേയും ബോസ്സ് ഇങ്ങനെ ചൂഴ്ന്നു നോക്കിയിട്ടില്ല. മനസ്സ് ചാഞ്ചാടിയിട്ടില്ല. പക്ഷേ, ഇപ്പോഴെന്തു പറ്റി.?!" ബൈനോക്കുലര്‍ കോബയില്‍ നിന്നും മത്സ്യകന്യകയില്‍ നിന്നും അശേഷം ചലിപ്പിക്കാതെ അടുത്തത് എന്ത് സംഭവിക്കുമെന്നറിയാനുള്ള ആകാംക്ഷയോടെ മോറീസ് അതേ നില്‍പ്പ് തുടര്‍ന്നു. തന്‍റെ ചിന്തകളേയും കെട്ടുകഥകളേയും ഇരിപ്പിടത്തില്‍തന്നെ ഉപേക്ഷിച്ച് ഡിക്സന്‍ കോബ എഴുന്നേറ്റ് നിന്ന് റെയ്ബാന്‍ തിരികെ ധരിച്ചു. പതിയെ മത്സ്യകന്യകയുടെ നേര്‍ക്ക് ചുവടുകള്‍ വച്ചു. "ഷിറ്റി ഗോഡ്! അദ്ധേഹമെന്തിനാണ് അവളുടെ നേര്‍ക്ക് ചെല്ലുന്നത്??!" മോറീസില്‍ കനത്ത സംശയം നിഴലിച്ചു. "ഗയ്സ്., ബോസ്സ് ആ പെണ്‍കുട്ടിയിലേക്ക് അടുക്കുകയാണ്. അവള്‍ ശത്രുവാണോ മിത്രമാണോ അറിയില്ല. എല്ലാവരും അവരവരുടെ പൊസിഷനില്‍ തന്നെ നിന്നുകൊണ്ട് ബോസ്സിനെ സംരക്ഷിക്കുക." മോറീസ് കോട്ടിനിടയിലേക്ക് ആജ്ഞാപിച്ചതും കൂടെയുള്ള കുഞ്ഞു സന്നാഹം മത്സ്യകന്യകയുടെ ശിരസ്സില്‍ തോക്കുകള്‍ ചൂണ്ടി ഉന്നം വെച്ച് ക്ഷമയോടെ കാത്തു. അരുതാത്തതെന്തിങ്കിലും ചിന്തിച്ചാല്‍ മത്സ്യകന്യകയുടെ ശിരസ്സ് രണ്ടായി പിളരും. ദുഃസൂചനയെന്നപോലെ അവള്‍ ഒരു ചെറുവിരല്‍ അനക്കിയാല്‍ പോലും അതുതന്നെയായിരിക്കും ഫലം.! ബൈനോക്കുലറിലൂടെ സൂക്ഷ്മമായി രംഗങ്ങള്‍ ഒപ്പിയെടുത്ത് മോറീസും. വെടിയുണ്ടകള്‍ നിറച്ച ആ പ്രത്യേകതര ബൈനോക്കുലറിന്‍റെ ബട്ടണില്‍ മോറീസിന്‍റെ ചൂണ്ടു വിരല്‍ അരിച്ചുകളിക്കുന്നുണ്ടായിരുന്നു. ലക്ഷ്യം, അതേ മത്സ്യകന്യകയുടെ ശിരസ്സ് തന്നെ! ഡിക്സന്‍ കോബ ഒടുവില്‍ അവളില്‍ നടന്നെത്തി. തന്നില്‍ മാത്രം നോക്കി നില്‍ക്കുന്ന പുരുഷനെ കണ്ട് മത്സ്യകന്യക സംശയത്തോടെയിരുന്നു. "ഹായ്.!" കോബയുടെ ചുണ്ടില്‍ പറഞ്ഞറിയിക്കാന്‍ കഴിയാത്ത വികാരം തിങ്ങി നിന്നു. കൂര്‍ത്ത ഒരു നോട്ടം, അതായിരുന്നു മത്സ്യകന്യകയുടെ മറുപടി. ആ നോട്ടം കോബയുടെ ഉള്ളങ്ങളില്‍ ആഴ്ന്നാഴ്ന്നിറങ്ങി. തങ്ങളുടെ റാണിയോട് ഒരു അപരിചിതന്‍ സംസാരിക്കുന്നത് ഇഷ്ടപ്പെടാത്ത തിരമാലകള്‍ വലിയ ക്രോധത്തോടെ പൊങ്ങിയടിച്ചു. അപ്പോള്‍ തെറിക്കുന്ന ജലകണങ്ങള്‍ അസ്ത്രം പോലെ കോബയില്‍ വര്‍ഷിച്ചു. എന്നാല്‍ അവയൊന്നും അയാളെ നോവിപ്പിച്ചില്ല. നിറവൃക്ഷം തങ്ങളുടെ മേല്‍ പൂക്കള്‍ കൊഴിക്കുകയാണെന്ന് ആ ജലകണങ്ങളെ കോബ സങ്കല്‍പ്പിക്കുകയായിരുന്നു. "ഇവിടെയെങ്ങും ഇതിനു മുമ്പ് കണ്ടിട്ടില്ല. എന്താ പേര്?!" കോബ ശാന്തമായി മന്ദഹസിച്ചു. ഈ അടുത്ത കാലത്ത് ഇത്രയും ബഹുമാനത്തോടെ, ശാന്തതയോടെ താന്‍ സംസാരിച്ചത് നെല്‍സനോട് മാത്രമാണെന്ന് അയാള്‍ ഓര്‍ത്തു നിര്‍ത്തി. "മെക്സിക്കോ സിറ്റിയിലെ എല്ലാവരേയും താങ്കള്‍ക്ക് അറിയുമോ?! അത്രയും വലിയൊരു പ്രമുഖനാണോ നിങ്ങള്‍?!" സൂചിമുന പോലെയുള്ള മത്സ്യകന്യകയുടെ മറുചോദ്യം കോബയ്ക്ക് നന്നേ ബോധിച്ചു. പരിഹാസമായ അവളുടെ ആ ശൈലിയില്‍ അയാളുടെ ചുണ്ടില്‍ ചിരി പടര്‍ന്നു. തന്‍റെ മുന്‍പില്‍ വന്നു നില്‍ക്കുന്നത് ആരെന്നോ, അയാളുടെ വലിപ്പമെന്തെന്നോ തിരിച്ചറിയാതെ തീര്‍ത്തും അഹന്തയോടെ അവള്‍ നിവര്‍ന്നിരുന്നു. മറ്റാരെങ്കിലും ആയിരുന്നെങ്കില്‍ ഇതിനകം ആ ശിരസ്സ് തുളഞ്ഞ് കോബയുടെ ബുള്ളറ്റ് പുറത്ത് തെറിച്ചേനെ! "അല്ല., ആ അര്‍ത്ഥത്തിലല്ല ഞാന്‍ പറഞ്ഞത്. ഈ മെക്സിക്കോ സിറ്റിയില്‍ ഒരുപാട് യുവതീ യുവാക്കളെ ഞാന്‍ കണ്ടിരിക്കുന്നു. എന്നാല്‍ ഇത്ര ദിവ്യ പ്രകാശമുള്ള ഒരു യുവതിയെ കാണുന്നത് ഇതാദ്യമാണ്. സത്യം, നിങ്ങള്‍ വളരെ സുന്ദരിയാണ്." അവളില്‍ ഒരു പൊട്ടിച്ചിരി അടര്‍ന്നു വീണു. "കൊള്ളാം..!! സ്ഥിരം കോഴികള്‍ ഉപയോഗിക്കുന്ന അതേ പ്രയോഗം! കാലം ഒരുപാട് കഴിഞ്ഞിരിക്കുന്നു മിസ്റ്റര്‍. പെണ്‍കുട്ടികളെ ഇമ്പ്രസ്സ് ചെയ്യിക്കാന്‍ പുതിയ അടവുകള്‍ പ്രയോഗിക്കൂ. അങ്ങനെയൊരെണ്ണം വേഗം കണ്ടെത്തൂ." അവള്‍ എഴുന്നേറ്റ് നിന്നു. ഡിക്സന്‍ കോബ അപ്പോഴും ശാന്തമായിരുന്നു. "ബോസ്സും ആ പെണ്‍കുട്ടിയും ഇതെന്താണ് ഇത്രമാത്രം സംസാരിക്കുന്നത്? ബോസ്സിന് പരിചയമുള്ള പെണ്‍കുട്ടി തന്നെയാണോ ഇത്?!" ഒന്നിനുമേല്‍ ഒന്നായി മോറീസില്‍ സംശയം കുമിഞ്ഞു കൂടി. "പുതിയ രീതികളെ കുറിച്ച് ഞാന്‍ ചിന്തിച്ചിട്ടില്ല. ഇതുകൊണ്ടൊന്നും നിങ്ങളെ ഇമ്പ്രസ്സ് ചെയ്യാന്‍ കഴിയില്ലെന്നും അറിയാം. എന്നാല്‍ ഒന്നുണ്ട്. ഒരാള്‍ തേന്‍ കലര്‍ത്തി സംസാരിച്ചാല്‍ അറിയാതെ അയാളില്‍ വീണു പോകുമോ എന്ന ഭയം നിങ്ങള്‍ക്കുണ്ട്. ഞാനത് കാണുന്നുമുണ്ട്." കോബ അശേഷം സംശയമില്ലാതെ പറഞ്ഞു. "ഓഹ് റിയലി! ആ കണ്ടുപിടുത്തം കൊള്ളാമല്ലോ!!" അവള്‍ കൈകെട്ടി നിന്നു. "അതെ, അതുകൊണ്ടാണ് നിങ്ങള്‍ വേഗം എന്‍റെ മുന്നില്‍ നിന്നും എഴുന്നേറ്റത്. നിങ്ങളുടെ പേര് പോലും പറയാത്തത്." "ഓഹ്., അതുശരി.! മരിയ.. മരിയ എന്നാണ് എന്‍റെ പേര്. എനിക്ക് ഭയമില്ല. നിങ്ങളെയെന്നല്ല ആരെയും ഞാന്‍ ഭയപ്പെടുന്നില്ല. നിങ്ങള്‍ അത്ര വലിയ കോഴിയാണെങ്കില്‍ എന്‍റെയീ രൂപവും ഈ പേരും വെച്ച് എന്‍റെ മുഴുവന്‍ ഹിസ്റ്ററിയും കണ്ടുപിടിക്കാന്‍ കഴിയുമോന്ന് നോക്ക്. അതുവഴി എന്നെ ഇമ്പ്രസ്സ് ചെയ്യാന്‍ ശ്രമിക്ക്. നമുക്ക് നോക്കാം." കോബ തലയാട്ടി ചിരിച്ചു. "ഇതൊരു ചലഞ്ചാണ്.!!" അവള്‍ പുരികം പൊക്കി. "എനിക്ക് ചലഞ്ചുകള്‍ വളരെ ഇഷ്ടമാണ്." കോബ സത്യം പറഞ്ഞു. അയാള്‍ ആ നില്‍പ്പ് തുടരേ അവള്‍ നടന്നകലുകയായിരുന്നു. *********************************************************************************************************************** തിരികെ കാറില്‍ സഞ്ചരിക്കുമ്പോഴും ഡിക്സന്‍ കോബയുടെ മനസ്സില്‍ ആ മത്സ്യകന്യക മാത്രമായിരുന്നു. നോട്ടം നിരത്തുകളില്‍ ആയിരുന്നെങ്കിലും ചിന്തകള്‍ അവളില്‍ നിന്നും അശേഷം പിന്നോട്ട് ചലിക്കുന്നില്ല. എന്തൊരു സ്ത്രീയാണവള്‍?! എന്തൊരു തേജസ്സാണവള്‍ക്ക്! അവള്‍ പ്രയോഗിക്കുന്ന വാക്കുകള്‍ ഞാന്‍ തൊടുത്തു വിടുന്ന വെടിയുണ്ടകളേക്കാള്‍ കൂര്‍ത്തതും, ആഴത്തില്‍ തുളഞ്ഞു കയറുന്നവയുമാണ്. കോബ ഒന്നു നെടുവീര്‍പ്പിട്ടു. മുന്നിലെ സീറ്റിലിരിക്കുന്ന മോറീസ് ആ ശ്വാസത്തെ കൊത്തിയെടുത്തു. എന്നാല്‍ കോബയോടുള്ള ഭയം മൂലം അയാള്‍ ഒന്നും നേരിട്ട് ചോദിക്കാനോ അന്വേഷിക്കാനോ മുതിര്‍ന്നില്ല. പറയുമ്പോള്‍ അദ്ധേഹം പറയട്ടേയെന്ന് നടിച്ചിരുന്നു. അപ്പോഴും തന്‍റെ ബോസ്സ് സംസാരിച്ച പെണ്‍കുട്ടിയോടുള്ള സംശയമായിരുന്നു മോറിസിന്‍റെ മനസ്സ് മുഴുവന്‍. "മോറീസ്.??" കോബ പിന്‍സീറ്റില്‍ നിന്നും വിളിച്ചു. "യെസ് ബോസ്സ്.!" അയാള്‍ വിളി കേട്ടു. "താന്‍ കന്യകയെ കണ്ടിട്ടുണ്ടോ?! അതായത് ഈ മത്സ്യകന്യക??!!" "കണ്ടിട്ടുണ്ടോ എന്നു ചോദിച്ചാല്‍ എനിക്ക് അതിന് ഉത്തരമില്ല ബോസ്സ്. പക്ഷേ ഒരിക്കല്‍ എന്‍റെ മുത്തശ്ശി ഈ മത്സ്യകന്യകയെ വരച്ചു തന്നിട്ടുണ്ട്." കോബ ശ്രദ്ധയോടെ കേട്ടിരുന്നു. "അതെ ബോസ്സ്. മുത്തച്ഛന്‍ ഒരു മീന്‍പിടുത്തക്കാരനായിരുന്നു. ഒരിക്കല്‍ പുറംകടലില്‍ മീന്‍ പിടിക്കാന്‍ പോയ അദ്ധേഹത്തിന്‍റെ വലയില്‍ കുടുങ്ങിയത് ഒരു മത്സ്യകന്യകയാണത്രേ!! ഇത്തരം മത്സ്യകന്യകയെ ഉപദ്രവിക്കുന്നതും കൊല്ലുന്നതും അയാളുടെ നാട്ടില്‍ നാശം വിതയ്ക്കുമെന്ന അന്ധവിശ്വാസത്തില്‍ വളരെയേറെ ഉറച്ചു നിന്ന മുത്തച്ഛന്‍ അതിനെ കടലിലേക്ക് പറഞ്ഞയച്ചു." "എങ്ങനെയുണ്ടായിരുന്നു മുത്തശ്ശി വരച്ചു കാട്ടിയ മത്സ്യകന്യക??!" കൗതുകത്തോടെ കോബ ചോദിച്ചു. "ഓഹ്.! അതോര്‍ക്കുമ്പോഴേ ഭയം തോന്നും. നീണ്ട കോമ്പല്ലുകളും രക്തം നിറഞ്ഞ കണ്ണുകളും തലയില്‍ രണ്ട് കൊമ്പുകളുമൊക്കെയുള്ള ഒരു രാക്ഷസ ചിത്രമാണ് മുത്തശ്ശി വരച്ചു കാട്ടിയത്. എന്നിട്ട് ഒരു ചോദ്യവും., ഇതിനെയൊക്കെ ആരാണാവോ മത്സ്യകന്യക എന്ന പേരിട്ടു വിളിച്ചത്." "തന്‍റെ മുത്തശ്ശി കൊള്ളാമല്ലോടോ മോറീസ്. നമ്മളൊക്കെ വായിച്ചറിഞ്ഞതും കേട്ടതുമൊക്കെയായ മത്സ്യകന്യകയുടെ നേര്‍ വിപരീതമായ ഒരു രാക്ഷസരൂപം!" കോബയില്‍ ചിരി പൊട്ടി. "അതെ ബോസ്സ്! മുത്തശ്ശി പറയുന്നത് ഇവറ്റകളൊക്കെ സീ മോണ്‍സ്റ്റര്‍ എന്നാണ്. കടലടിത്തട്ടിലെ രാക്ഷസന്മാര്‍. അപൂര്‍വ്വത്തില്‍ അപൂര്‍വ്വമായ ചില നിമിഷങ്ങളില്‍ മാത്രമേ ഇവറ്റകള്‍ കടലിന്‍റെ മുകള്‍ത്തട്ടിലേക്ക് വരികയുള്ളൂ. ചില മനുഷ്യര്‍ക്ക് ഭാഗ്യമുണ്ടെങ്കില്‍ അതിനെ കാണാന്‍ സാധിക്കും. അങ്ങനെ നോക്കുകയാണേല്‍ എന്‍റെ മുത്തശ്ശന്‍ അതിഭാഗ്യവാനാണ്. അദ്ദേഹത്തിന് തൊട്ടടുത്ത് അതിനെ കാണാനും തൊടാനും കഴിഞ്ഞല്ലോ!!" "മെക്സിക്കോയിലെ കടലോര പ്രദേശങ്ങളില്‍ ജീവിക്കുന്ന ആളുകള്‍ക്കിടയില്‍ പൊതുവേ പരക്കുന്ന., അല്ലെങ്കില്‍ അവര്‍ ഒരുപോലെ വിശ്വസിക്കുന്ന സീ മോണ്‍സ്റ്ററെന്ന രാക്ഷസന്മാരുടെ കഥ ഒരു പൊടിപ്പും തൊങ്ങലുമില്ലാതെയാണ് തന്‍റെ മുത്തശ്ശി തനിക്ക് വിവരിച്ചു തന്നിരിക്കുന്നത്. എന്നാല്‍ ശരിക്കുമുള്ള മത്സ്യകന്യകകള്‍ അതിനുമപ്പുറത്തേക്കാണ്. അവര്‍ ദേവതകളെ പോലെയാണ്. ഏതൊരു പുരുഷനും ആഗ്രഹിക്കുന്നതരം വശ്യ സുന്ദരികളാണ്. അങ്ങനെയൊരു മത്സ്യകന്യകയേയാണ് ഞാന്‍ അല്‍പ്പം മുമ്പ് കണ്ടതും സംസാരിച്ചതും... ഇത്ര ഷാര്‍പ്പായ ഒരു പെണ്‍കുട്ടിയെ ഞാനിതുവരെ കണ്ടിട്ടില്ല. അവളുടെ നോട്ടം പോലും രണ്ട് അഗ്രവും മൂര്‍ച്ചയേറിയ കഠാരയ്ക്ക് സമമാണ്. സൂക്ഷിച്ച് നിന്നില്ലെങ്കില്‍ ആ നോട്ടം പതിയുന്ന എന്തും രണ്ടായി വിണ്ടുകീറും.!!" കോബ പറഞ്ഞതില്‍ മോറീസ് തലയാട്ടി. "എന്തോ, അവളെന്നെ വല്ലാതെ അലട്ടുന്നു. മായ്ച്ചു കളയാന്‍ ശ്രമിക്കുംതോറും വീണ്ടും നല്ല വ്യക്തതയോടെ തെളിഞ്ഞു വരുന്ന മുഖം. ചുമ്മാ ഒരു സൗഹൃദ സംഭാഷണം നടത്താമെന്ന് കരുതിയാണ് അവളോട് ഞാന്‍ അങ്ങോട്ട് മിണ്ടിയത്. പക്ഷേ അവിടെയും അവളൊരു മത്സ്യകന്യകയെ പോലെ പിടി തരാതെ വഴുതി മാറി. രക്ഷപ്പെടാനായി ഒരു ചലഞ്ചും എന്‍റെ നേര്‍ക്ക് ഇട്ടു തന്നു." "ചലഞ്ചോ?!" മോറീസ് പെട്ടെന്ന് തിരിഞ്ഞു നോക്കി. "ബോസ്സിനോട് ചലഞ്ച് ചെയ്തെന്നോ?! അതും ഒരു പെണ്‍കുട്ടി. തീര്‍ത്തും നരുന്ത് പോലെയുള്ള പെണ്‍കുട്ടി. കേട്ടിട്ട് എന്‍റെ കൈ തരിക്കുന്നു. ബോസ്സ് ഒന്നു ചെറുവിരല്‍ അനക്കിയെങ്കില്‍ അവളുടെ തലച്ചോര്‍ ഞാന്‍ പുറത്തേക്ക് തെറുപ്പിക്കുമായിരുന്നു." അയാള്‍ പല്ലുകള്‍ ഞെരിച്ച ശബ്ദം കോബ വ്യക്തമായി കേട്ടു. "എടോ., തന്നോട് ഇതൊന്നും പറഞ്ഞിട്ട് കാര്യമില്ല. എന്‍റെ വികാരത്തെ തന്നെപ്പോലെയുള്ളവനോടൊക്കെ പറയാന്‍ പോയ എന്നെ വേണം പറയാന്‍.. നോക്കൂ മോറിസ്., നമ്മളൊക്കെ രാക്ഷസന്‍മാരാണ്. താന്‍ അല്‍പ്പം മുമ്പ് വിവരിച്ച, തന്‍റെ മുത്തശ്ശി പറഞ്ഞു തന്ന സീ മോണ്‍സ്റ്ററേക്കാള്‍ അതിഭയങ്കരമായ രാക്ഷസന്മാര്‍. കൊന്നും കൊലവിളിച്ചും രക്തക്കളം തീര്‍ത്തും നാടിനെ വിറപ്പിക്കുന്ന അധോരാക്ഷസന്മാര്‍. എന്നാല്‍ ഇങ്ങനെയുള്ള നേര്‍ത്ത വെളിച്ചം നമ്മുടെയൊക്കെയുള്ളില്‍ ജനിക്കുന്ന അപൂര്‍വ്വം ചില നിമിഷങ്ങളുണ്ട്. അതിനെ സമാധാനമായി ആസ്വദിക്കണം. കുസൃതിയോടെ നേരിടണം. അതില്‍ ആനന്ദവും സന്തോഷവും കണ്ടെത്തണം." മോറിസ് ഇളിഭ്യതയോടെ തലയാട്ടി. കോബ തുടരുകയായിരുന്നു : "മരിയ.., മരിയ എന്നാണ് ആ പെണ്‍കുട്ടിയുടെ പേര്. അവള്‍ ആ പേരും വെളിപ്പെടുത്തി അവളുടെ സുന്ദരമായ രൂപവും കാണിച്ചു തന്ന്, അവളാരെന്ന് ഞാന്‍ കണ്ടെത്തി കൊടുത്ത് അവളെയൊന്നു ഇമ്പ്രസ്സ് ചെയ്യാന്‍ കഴിയുമോ എന്നാണ് ചലഞ്ച് ചെയ്തിരിക്കുന്നത്. ഇതിനെയാണ് താന്‍ വെടിയുണ്ടയെന്നും തലച്ചോറെന്നുമൊക്കെ രോഷം പൂണ്ട് പുലമ്പിയത്." "സോറി ബോസ്സ്." മോറീസ് ആത്മാര്‍ത്ഥമായി ക്ഷമ പറഞ്ഞു. "ഇത് നിസാര കാര്യമല്ലേ ബോസ്സ്. വിത്തിന്‍ ഹവേര്‍സ് ആ പെണ്‍കുട്ടിയുടെ മുഴുവന്‍ ഹിസ്റ്ററിയും ഈ മോറീസ് കണ്ടെത്തി തരും." "സൂക്ഷിക്കണം മോറിസ്. ഞാന്‍ ആരെന്നും എന്തെന്നും അവള്‍ക്കറിയില്ല. അവളത് അറിയാതെ വേണം കാര്യങ്ങള്‍ കൈകാര്യം ചെയ്യാന്‍." "എനിക്കറിയാം ബോസ്സ്.! ബോസിനെ അറിയാമായിരുന്നെങ്കില്‍ ഇത്ര അഹന്തയോടെ നിവര്‍ന്നു നിന്ന് ആ കുട്ടി ഒരിക്കലും സംസാരിക്കില്ലായിരുന്നു. ഇതെനിക്ക് വിട്ടേക്കൂ. കാര്യങ്ങള്‍ വളരെ സ്മൂത്തായി ഞാന്‍ കൈകാര്യം ചെയ്തോളാം." മോറിസിന്‍റെ വാക്കുകളില്‍ വിശ്വാസം കണ്ടെത്തി കോബ ചാരിയിരുന്ന് കണ്ണുകളടച്ചു. അപ്പോഴും ഉള്ളിന്‍റെയുള്ളില്‍ നിന്നും മരിയ തിരതള്ളി തെളിഞ്ഞു വരികയായിരുന്നു. *********************************************************************************************************************** ഡിക്സന്‍ കോബയുടെ കൂറ്റന്‍ ബംഗ്ലാവിനു മുന്നില്‍ ആ കാറുകള്‍ പ്രകോപനപരമായ ശബ്ദത്തോടെ ഒടുവില്‍ നിശ്ചലമായി. "നെല്‍സന്‍??" അകത്തു പ്രവേശിച്ച കോബ മുന്നിലെത്തിയ ആല്‍ബര്‍ത്തോയോട് ചോദിച്ചു. "മുകളിലുണ്ട് ബ്രോ! അവനെന്തൊക്കെയോ ആലോചിക്കുകയാണ്. അതും ജുവാനയുടെ ചിത്രം നോക്കി." ആല്‍ബര്‍ത്തോ പറഞ്ഞു. "എന്തായി നീ പോയ കാര്യം? വല്ല കുഴപ്പവും ഒപ്പിച്ചോ നീ.??" "ഏയ് നെവര്‍ ബിഗ് ബ്രോ! ഞാന്‍ മാന്യമായി തന്നെ ആ റഷ്യാക്കാരനോട് പെരുമാറി." "നല്ലത്. എവിടേക്കും പോകാതെ നീ ഇവിടെതന്നെയുണ്ടാവണം." കോബ പിന്നിലേക്ക് തിരിഞ്ഞ് മോറിസിനെ നോക്കി. "ഇന്നിനി ഒരു പരിപാടിക്കും ഞാനില്ല മോറിസ്. വല്ലാത്ത ക്ഷീണം തോന്നുന്നു. പ്രധാനപ്പെട്ട കാര്യങ്ങള്‍ താന്‍ തന്നെ ചെയ്തു തീര്‍ത്താല്‍ മതി." മോറീസ് തലയാട്ടി. "പിന്നെ, ആ മത്സ്യകന്യകയുടെ കാര്യം മറക്കണ്ട." "ശരി ബോസ്....." മോറിസ് ചെറുതായൊന്നു ചിരിച്ചു. "മത്സ്യകന്യകയോ?!! ഏത് മത്സ്യകന്യക?! എവിടെയാണത്?! എനിക്കതിനെ കാണാന്‍ സാധിക്കുമോ?!" അമിത ഉത്കണ്ഠയോടെ ആല്‍ബര്‍ത്തോ ചോദിച്ചതിന് ചിരി തന്നെയായിരുന്നു മോറിസിന്‍റെ മറുപടി. "ആല്‍ബര്‍ത്തോ., കാര്യങ്ങളെല്ലാം നീ അറിയുമ്പോള്‍ അറിയും. പറയേണ്ട സമയം ആവുമ്പോള്‍ ഞാന്‍ പറയും. തല്‍ക്കാലം അടങ്ങിയൊതുങ്ങി നീ ഇവിടെയിരിക്ക്. മോറിസിനെ ശല്യപ്പെടുത്തരുത്." വളരെ ഗൗരവപൂര്‍വ്വം കോബ പറയുമ്പോള്‍ നല്ലൊരു വിദ്യാര്‍ത്ഥിയെ പോലെ അനുസരണയോടെ തല കുനിച്ച് തന്‍റെ ഇരിപ്പിടത്തിലേക്ക് ആല്‍ബര്‍ത്തോ നീങ്ങിയതും മോറീസ് പുറത്തേക്കിറങ്ങി. മുകളിലെ നെല്‍സന്‍റെ മുറിയുടെ കതക് കോബ തള്ളി തുറന്നു. ഭിത്തിയില്‍ തൂക്കിയിട്ട ജുവാനയുടെ ഫോട്ടോ നോക്കി അവന്‍ ശാന്തമായിരിക്കുന്നു. കതകിനടുത്തെ കാല്‍പ്പെരുമാറ്റം കേട്ട് നെല്‍സന്‍ വീല്‍ചെയറോടെ തിരിഞ്ഞു നോക്കി. തന്നില്‍ ഇമ വെട്ടാതെ പുഞ്ചിരിച്ച് നില്‍ക്കുന്ന കോബയെ കണ്ട് അവന്‍റെ കണ്ണുകള്‍ പ്രകാശിച്ചു. "പ.. പ.. പപ്പാ..?!" അവനൊന്നു ചിരിച്ചു. വീല്‍ചെയറിലെ കുഞ്ഞു ലിവര്‍ അനക്കിയതും അത് നെല്‍സനുമായി കോബയുടെ മുന്നോട്ടടുത്തു. പുത്രന്‍റെ മൂര്‍ധാവില്‍ വാത്സല്ല്യത്തോടെ കോബ ചുംബിച്ചു. "മമ്മയോട് എന്തായിരുന്നു നിന്‍റെ വര്‍ത്തമാനം??!" "ന.. നത്തിംഗ് പപ്പാ.. ഞാ.. ഞാ.. ഞാന്‍ മമ്മയെ ഇങ്ങനെ നോ.. നോ.. നോക്കിയിരിക്കുകയായിരുന്നു." "നല്ലത്.! സ്വര്‍ഗ ലോകത്തിരുന്ന് മാലാഖമാരോടൊപ്പം മോന്‍റെ മമ്മ മോനേയും കാണുന്നുണ്ട്." നെല്‍സന്‍ കോബയുടെ നെഞ്ചിലമര്‍ന്നു. ഒരിക്കല്‍കൂടി അയാള്‍ മകനെ ചുംബിച്ചു. "ഇന്ന് വിചിത്രമായ ഒരു സംഭവം നടന്നു. അത് മോനോട് വിവരിക്കാനാണ് പപ്പ ഓടിയെത്തിയത്." സംശയത്തോടെ നെല്‍സന്‍ കോബയെ നോക്കി. "പപ്പ എന്നും മോന് വായിച്ചു തരാറുള്ള ആ മത്സ്യകന്യകയുടെ കഥ. ഇന്ന് അതിനെ ഞാന്‍ നേരില്‍ കണ്ടു. സംസാരിച്ചു. ആ പ്രകാശത്തില്‍ മതിമയങ്ങി നിന്നു." നെല്‍സന്‍റെ കണ്ണുകള്‍ കൗതുകത്തോടെ കോബയില്‍ അമര്‍ന്നു. "റിയലി?!!" "യെസ് മൈ ഡിയര്‍ സണ്‍..! ആ മത്സ്യകന്യക ഒരു സംഭവം തന്നെയായിരുന്നു." മരിയയെ കണ്ടുമുട്ടിയ നിമിഷങ്ങള്‍ എണ്ണിപ്പെറുക്കിയെടുത്ത് മകന്‍റെ മുന്നില്‍ കോബ വാചാലനായി. അതെല്ലാം നെല്‍സന്‍ ശ്രദ്ധയോടെ കേട്ടിരുന്നു. എല്ലാം കഴിഞ്ഞപ്പോള്‍ അവന്‍ ശക്തമായി ശ്വാസം വിട്ടു. "എ.. എനിക്കിപ്പോള്‍ മ.. മനസിലായി പ.. പപ്പാ.." കോബ പുരികമുയര്‍ത്തി. "അവര്‍ ക.. ക.. കടലടിത്തട്ടില്‍ നിന്നും ഉ.. ഉ.. ഉയര്‍ന്നു വന്ന മ.. മത്സ്യകന്യകയാണെന്ന് പ.. പപ്പ ഊഹിച്ചെടുത്തെങ്കില്‍ ഞാ.. ഞാന്‍ ഊഹിച്ചത് മറ്റൊന്നാണ്." "എന്താണത്?!" "അവര്‍ മ.. മത്സ്യകന്യകയല്ല., സ്വര്‍ഗ്ഗ ലോകത്തു നി.. നിന്നും ഭൂമിയിലേക്കിറങ്ങി വ.. വന്ന മാലാഖയാണ്. അ.. അല്‍പ്പം മുമ്പ് പപ്പ പ.. പറഞ്ഞതുപോലെ മ.. മമ്മയുടെ അരികില്‍ നിന്നും പ.. പ.. പറന്നു വന്ന മാലാഖ..... രക്തക്കറകള്‍ പുരണ്ട പ.. പ.. പപ്പയുടെ ഉള്ളങ്ങളില്‍ മു.. മു.. മുല്ലപ്പൂ ഗന്ധം പരത്താന്‍ ഇറങ്ങി വന്ന മാലാഖ." കോബ ഉള്ളില്‍ ചിരിച്ചു. എത്ര മനോഹരമായാണ് നെല്‍സന്‍ തന്‍റെ സ്ഥാനത്തെ അളന്നത്. രക്തക്കറ പുരണ്ട ഉള്ളങ്ങള്‍ എന്നു പറയുമ്പോള്‍ സാത്താനെന്നര്‍ത്ഥം. അതിലേക്കാണ് മത്സ്യകന്യകയെ പോലെ അവള്‍ വന്നത്. വാക്കുകള്‍ പ്രയോഗിക്കാന്‍ തന്‍റെ മകന്‍ പഠിച്ചിരിക്കുന്നു. ചിലപ്പോള്‍ പുസ്തകങ്ങളില്‍ നിന്നുമായി കടമെടുത്തത്. അല്ലെങ്കില്‍ സ്വപ്നങ്ങളില്‍ ഒഴുകിയെത്തി അവന്‍റെ മമ്മ കാതില്‍ മന്ത്രിച്ചത്. എന്തായാലും ഇലയ്ക്കും മുള്ളിനും കേടു വരാതെ നെല്‍സന്‍ അത് അവതരിപ്പിച്ചു. അവന്‍റെ മമ്മയുടെ അതേ പ്രകൃതം. "എ.. എന്താണ് പ.. പ.. പപ്പ ചിന്തിക്കുന്നത്?!" കോബയുടെ ആലോചനകളില്‍ കടന്നുചെന്ന് നെല്‍സന്‍ ചോദിച്ചു. "നിന്‍റെ വായന അമിതമാണോ എന്ന് ചിന്തിച്ചതാ..." കോബ നുണ പറഞ്ഞു. നെല്‍സന്‍ ചിരിച്ചു പോയി. അടുത്തതായി അവന്‍റെ ആഗ്രഹം കേട്ട് ഡിക്സന്‍ കോബ അല്‍പ്പമൊന്ന് പ്രയാസപ്പെടുകയായിരുന്നു. തന്‍റെ പപ്പ നിമിഷങ്ങള്‍ ചിലവഴിച്ച ആ മത്സ്യകന്യകയെ അവന് കാണണമത്രേ! പരിചയപ്പെടണമത്രേ!! ((തുടരും)) കണ്ണൂർകാരൻ 🥰🥰🥰🥰🥰 #📔 കഥ #✍ തുടർക്കഥ #📙 നോവൽ #🕵️‍♀️ കുറ്റാന്വേഷണ കഥകൾ #🧟 പ്രേതകഥകൾ!