#📙 നോവൽ മുറിയിലേക്ക് കയറി വരുന്നത് കണ്ടപ്പോൾ ഗംഗ കട്ടിലിൽ നിന്നും എഴുന്നേറ്റു. ഇതാ ചേച്ചി,, ഇവിടെ വിരിച്ചോളൂട്ടോ.. ചേച്ചിയ്ക്കു ഈ പുതപ്പ്,, ഇത് പുതിയതാ, അമ്മ കട്ടപ്പനയ്ക്ക് പോയപ്പോൾ വാങ്ങിയതാണ്. പിന്നെ ദേ ഇത് ചേട്ടന്റെത്.. ഓരോന്നും വ്യക്തമായി കാണിച്ചുകൊണ്ട് മാളു പറയുകയാണ്.. എല്ലാം കേട്ട് ഗംഗ തലകുലുക്കികൊണ്ട് കട്ടിലിന്റെ ഒരറ്റത്ത് നിന്നു.. അനന്തൻ പിന്നിൽ നിൽക്കുന്നത് കണ്ടുകൊണ്ട് മാളു അവന്റെ അരികിലേക്ക് വന്നു. ചേട്ടന് നാളെ ഓട്ടം ഉണ്ടോ. ഹമ്... ഒണ്ട്.. എന്താടി.. ഹേയ് ഒന്നുല്ല.. അമ്മ ചോദിച്ചത നാളെ വെളുപ്പിനെ മൂന്നു മണിയാവുമ്പോൾ എഴുന്നേറ്റു പോണം. കുറച്ച് ഓർഡർ കിട്ടിയിട്ടുണ്ട്.. ഒന്ന് രണ്ട് കേറ്ററിംഗ് പാർട്ടി. മ്മ്... നന്നായി.. സെൽവം കൂടെ വരില്ലേ .. ഇല്ലടി... അവനോട് കട തുറക്കാൻ ഞാൻ പറഞ്ഞിട്ടുണ്ട്.. രണ്ടു ദിവസമായിട്ട് കട വൈകി തുറക്കുന്നത് കൊണ്ട് കടയിലെ കച്ചവടം ഇത്തിരി കുറഞ്ഞു.. അതുകൊണ്ട് ഞാൻ ഒറ്റയ്ക്കാണ് പോകുന്നത്...നിനക്ക് നാളെ കോളേജില്ലേ. ഒണ്ട്.... ആഹ്..... എന്നാൽ ചെന്ന് കിടക്കാൻ നോക്ക്.. അനന്തൻ പറഞ്ഞതും മാളു മുറിയിൽ നിന്നും ഇറങ്ങിപ്പോയി. ഈ സമയത്ത് ഉമയാണെങ്കിൽ അവരുടെ സഹോദരനെയും അനന്തന്റെ അച്ഛൻ പ്രസന്നന്റെ പെങ്ങളെയും ഒക്കെ ഫോണിൽ വിളിക്കുകയാണ്‌. ഹലോ.... സുശീലചേച്ചി.... കിടന്നാരുന്നോ. ഇല്ലടി ഉമേ... എന്നാടി ഈ രാത്രിയില്.. പ്രസന്നന്റെ മൂത്ത സഹോദരിയാണ് സുശീല.. അത് പിന്നെ ചേച്ചി ഇന്ന് ഇവിടെ ഒരു സംഭവം ഉണ്ടായി... ഉമയാണെകിൽ മകൻ ഒരു പെണ്ണിനെയും വിളിച്ചു കൊണ്ടു വന്ന വിവരങ്ങളെല്ലാം അവരോട് പറഞ്ഞു കേൾപ്പിച്ചു. ദൈവമേ... അനന്തനോ.. എടി എനിക്ക് വിശ്വസിക്കാൻ പോലും പറ്റുന്നില്ല.. അവൻ അങ്ങനെയൊരു പയ്യനായിരുന്നോടി. എന്റെ ചേച്ചി ഒരിക്കലും സ്വപ്നത്തിൽ പോലും ഞാനും ഇങ്ങനെയൊന്നും കരുതിയിട്ടു പോലുമില്ല. ഞാനും മാളുവും വിളക്ക് കത്തിച്ച് നാമം ചൊല്ലി കഴിഞ്ഞപ്പോഴാണ് അവൻ ആ പെൺകൊച്ചിനെയും വിളിച്ചുകൊണ്ടുവന്നത്. പെണ്ണ് കാണാനെങ്ങനെയുണ്ട്... നല്ല സുന്ദരിക്കുട്ടിയാണ്..സിനിമ നടി പോലെ. വെളുത്തു ചുവന്നാ ഇരിക്കുന്നത്, കണ്ടിട്ട് കാശുള്ള വീട്ടിലെ കുട്ടിയെ പോലെയാണ്.. ഇവനെ എങ്ങനെ ഇഷ്ടപ്പെട്ടു എന്ന് ഞാൻ സത്യത്തിൽ ഓർത്തുപോയി അവനെന്താടി ഒരു കുഴപ്പം.. ഇത്തിരി നിറം കുറവുണ്ടെന്നല്ലേ ഉള്ളൂ . ആ കൊച്ചിന്റെ നാട് എവിടെയാ... നാട് എറണാകുളത്തു.. യ്യോ.. അവിടുന്ന് എങ്ങനെയാടി ഇവൻ ഈ പെണ്ണിനെയൊക്കെ കണ്ടു മുട്ടിയത്. എന്റെ ചേച്ചി.. വിശദമായിട്ട് അവനോട് ചോദിച്ചറിയണമെങ്കിൽ ചേച്ചി നാളെ ഇങ്ങോട്ട് വാ.... ചേച്ചിക്ക് സമയം കിട്ടുമോ.. നോക്കട്ടെ പെണ്ണെ.... ഇവിടുത്തെ കാര്യം അറിയാല്ലോ... ഞാൻ എവിടെയെങ്കിലും പോകാൻ ഇറങ്ങിയാൽ അശ്വതിയുടെ മുഖം വീർക്കും.. പിന്നെ കൂടാന്ന് അനുപിവിന്റെ കാതിലോട്ട് എന്നെതെങ്കിലും ഓതി കൊടുക്കും.. കഴിഞ്ഞമാസം അഞ്ചുമോൾടെ വീട്ടിൽ പോയി നിന്നേന് എന്തെല്ലാം പുകിലായിരുന്നു ഇവിടെ.. വന്നിട്ട് മറ്റന്നാൾ അങ്ങ് പോകാ ചേച്ചീ. ചേച്ചി കൂടി ഉണ്ടെങ്കിൽ പിള്ളേരോട് രണ്ടുപേരോടും കാര്യങ്ങളൊക്കെ ചോദിച്ചറിയാമായിരുന്നു. അവൻ താലികെട്ടിയിട്ടൊന്നുമില്ലല്ലൊ.. നമുക്ക് ചെറിയൊരു ചടങ്ങെങ്കിലും നടത്തണ്ടയോ.. നീ പറഞ്ഞതൊക്കെ ശരിയാ.. ഞാനേ ഇവിടെ അനൂപിനോട് നയത്തില് കാര്യങ്ങളൊന്ന് സംസാരിക്കട്ടെ. ഇതും പറഞ്ഞു വരാൻ പറ്റത്തില്ല. വേറെ എന്തെങ്കിലും പറയാം അല്ലേ... അതാ ചേച്ചി നല്ലത്.. ഇനി അനൂപെങ്ങാനും അനന്തനെ വിളിച്ചിട്ടുണ്ടെങ്കിൽ ഇവിടെ കോളിളക്കം ഉണ്ടാക്കും. അവന്റെ സ്വഭാവം അറിയാല്ലോ.. വെട്ടൊന്നു തുണ്ടം രണ്ട് ആണവന്.. അറിയാടീ പെണ്ണെ... അതൊക്കെ കണ്ട് ഞാൻ എന്തേലും കള്ളം പറഞ്ഞു വരാം കെട്ടോ. ഹമ്... എന്നിട്ട് ചേച്ചി ഇവിടെ വന്നിട്ട് ചെല്ലുമ്പോൾ കാര്യങ്ങൾ പറഞ്ഞൽ മതി. മ്മ്.. നീ വെച്ചോ.. അശ്വതി വരുന്നുണ്ട്. ആഹ് ശരി ചേച്ചി... ഉമ ഫോൺ കട്ട് ചെയ്തു. എല്ലാം കേട്ട് കൊണ്ട് മാളു അടുത്തിരിപ്പുണ്ട്. അപ്പച്ചി എന്നാ പറഞ്ഞു.? നാളെ ഇങ്ങോട്ട് വരും.. എന്നിട്ട് എല്ലാരും കൂടി ഒരു തീരുമാനം ഉണ്ടാക്കണ്ടേ. എങ്ങാനും ആ പെൺകൊച്ചിന്റെ വീട്ടുകാർ വന്നാല് നമ്മുടെ ചെറുക്കനെ പോലീസ് കൊണ്ട് പോകും. പിന്നെ... ഒന്ന് പോ അമ്മേ... എടി.. ഞാൻ ഉള്ള കാര്യമാ പറഞ്ഞത്.. ഇന്നത്തെ കാലം കെട്ടകാലമടി കൊച്ചേ... ഞാനെ സജീവിനെ ഒന്ന് വിളിക്കട്ടെ കേട്ടോ. ഉമ അവരുടെ ആങ്ങള യെയും വിളിച്ചു ഇതേ പോലെ കാര്യങ്ങൾ പറഞ്ഞു. എല്ലാവർക്കും ഞെട്ടൽ ആയിരുന്നു.. കാരണം അനന്ദന്റെ സ്വഭാവം അവർക്കൊക്കെ അറിയാം.. അവനിങ്ങനെ ഒരു പെണ്ണിനെ പ്രേമിച്ച് വിളിച്ച് ഇറക്കി കൊണ്ടു വരുമെന്ന് ആരും ഒരിക്കലും വിചാരിച്ചിരുന്നില്ല. ഞാനിപ്പോൾ വന്നാൽ ശരിയാവില്ല, ചേച്ചി ഒരു കാര്യം ചെയ്യ്, ആദ്യം സുശീലാമ്മ വന്നു സംസാരിക്കട്ടെ എന്നിട്ട് അനന്തനെ ഞാൻ വിളിക്കാം.. അതുപോരെ മതിയെടാ അങ്ങനെ ചെയ്താൽ മതി.. ഹമ്.. ശരി,, സജീവ് ഫോൺ കട്ട് ചെയ്തു. ഈ സമയത്ത് അനന്തൻ അവന്റെ തടിയലമാരയുടെ മുകളിലായി ഇരുന്ന പുൽപ്പായ എടുത്തു തറയിലേക്ക് വിരിച്ചു. അതിൽ ബെഡ്ഷീറ്റും ഇട്ടിട്ട് തല യിണ കൂടി വെച്ചു. താൻ കട്ടിലിൽ കിടന്നോ കേട്ടോ.. നല്ല തണുപ്പ് ഉണ്ട്.... പറയുകയും അവൻ ലൈറ്റ് ഓഫ് ചെയ്തിട്ട് നിലത്തുവിരിച്ച പായയിലേക്ക് കിടന്നു കഴിഞ്ഞു. ഇവിടെ കിടന്നോളു ഞാൻ നിലത്തു കിടക്കാ.. ഗംഗ പതിയെ പറയുകയാണ്. വേണ്ട... നല്ല തണുപ്പാ... കുഴപ്പമില്ല...ഞാൻ കിടന്നോളാം. നിന്നോട് മലയാളത്തിൽ അല്ലേടി പറഞ്ഞത് കട്ടിലിൽ കിടക്കാന്.. അനന്തന്റെ ശബ്ദം പെട്ടെന്ന് മാറിയതും ഗംഗ കട്ടിലിൽ ഇരുന്നു കഴിഞ്ഞു. ഞാൻ വെളുപ്പിനെ എണീറ്റ് പോകും. എനിക്ക് കമ്പത്തിന് പച്ചക്കറി എടുക്കാൻ പോകേണ്ടതാണ്. അമ്മയോ മാളുവോ കൂടുതലായി എന്തെങ്കിലും ചോദിച്ചാൽ ഒന്നു വിശദീകരിക്കാൻ നിന്നേക്കരുത്. നമ്മൾ തമ്മിൽ ഇഷ്ടമായിരുന്നു എന്ന് മാത്രം അവരോട് പറഞ്ഞാൽ മതി. എവിടെ വച്ചാണ് കണ്ടുമുട്ടിയതെന്ന് ചോദിച്ചാൽ നീയ് കുറച്ചുനാൾ മഠത്തിൽ നിന്നിരുന്നു എന്ന് പറഞ്ഞാൽ മതി കേട്ടോ. ഹമ്.... അവൾ മൂളി. നിന്റെ വീട്ടുകാർ ആരെങ്കിലും നിന്നെ കാണാനില്ലെന്ന് പറഞ്ഞ് കേസ് കൊടുക്കുമോ.. അറിയില്ല... നിന്റെ കെട്ടിയോനോ... അയാൾ കേസ് കൊടുക്കാൻ തീരെ സാധ്യതയില്ല. നിന്റെ വീട്ടുകാരുടെ ഫോൺ നമ്പർ അറിയാമെങ്കിൽ എന്തെങ്കിലും വിളിച്ചു പറയ്. ഏതെങ്കിലും കൂട്ടുകാരീടെ വീട്ടിൽ ആണെന്നോ മറ്റോ.. ഇനി ഇങ്ങോട്ടെങ്ങാനും പോലീസ് വന്നാലേ കാര്യങ്ങളൊക്കെ കുഴയും... ഞാൻ തിരിച്ചു പോയാലോന്ന് ഓർക്കുക.. പിന്നെ എന്നാ കാണാനാ നീ ഇങ്ങോട്ട് കെട്ടിയെടുത്ത് വന്നത്.. അവിടെ നിന്നാൽ പോരായിരുന്നോ. എന്റെ സാഹചര്യം അങ്ങനെ ആയിപ്പോയി. അതുകൊണ്ട് പോന്നതാ... ഗംഗയുടെ ശബ്ദം ഇടറി.. ആലോചിച്ച് ചെയ്യണമായിരുന്നു.. ഒരെടുത്ത്ചാട്ടത്തിന് കിണറ്റിലോട്ട് പോയാൽ പിന്നെ കേറിവരാൻ ഇച്ചിരി പാടാ.. അനന്തൻ വഴക്ക് പറഞ്ഞതും ഗംഗയുടെ മിഴികൾ നിറഞ്ഞൊഴുകി.. ഞാന് നാളെ ലീനാമ്മയോട് പോയി സംസാരിക്കാം. എന്നിട്ട് നിന്നെ അവിടേക്ക് മാറ്റാം. ഇവിടെഎന്ത് പറയും.. അമ്മയോടൊക്കെ. അതെന്തെങ്കിലും അപ്പൊ പറഞ്ഞോളാം... ഞാന് എങ്കിലെന്റെ അനിയത്തിയെ ഒന്ന് വിളിക്കട്ടെ... വിളിച്ചു പറ... ഇല്ലെങ്കിൽ എല്ലാംകൂടി പോലീസിനെ കൊണ്ട് ഇങ്ങോട്ട് വന്നാൽ ഈ നാട്ടിലെ എനിക്ക് തല ഉയർത്തി നടക്കാൻ പറ്റില്ല. അനന്തൻ ഒരു പെണ്ണിനെ വിളിച്ചുകൊണ്ട് വന്നെന്നറിഞ്ഞാലേ ഒരൊറ്റ മനുഷ്യര് പോലും വിശ്വസിക്കില്ല. ഇന്നുവരെ ഇതുപോലെ ഒരു എടാകൂടത്തിലും കൂട്ടത്തിലും ഞാൻ ചെന്ന് പെട്ടിട്ടുമില്ല. അവൻ രൂക്ഷമായി പറഞ്ഞു. തുടരും