കതിരണിഞ്ഞ സ്വപ്‌നങ്ങൾ ഭാഗം 4 ക്ഷേത്രത്തിൽ നിന്ന് മടങ്ങിയ ആ ദിവസത്തിന് ശേഷം ലോകേഷ് പഴയതുപോലെ ആയിരുന്നില്ല. അവൻ ആരോടും തന്റെ വിഷമം പറഞ്ഞില്ല. കമല പലതവണ ചോദിച്ചെങ്കിലും "ഒന്നുമില്ല അമ്മേ..." എന്ന ഒറ്റ മറുപടിയായിരുന്നു. പക്ഷേ ഒരു അമ്മയ്ക്ക് മകന്റെ മനസ്സ് വായിക്കാൻ അധികം വാക്കുകൾ വേണ്ട… ആ രാത്രിയിൽ ലോകേഷ് വീടിന്റെ മുന്നിലെ മാവിൻചുവട്ടിൽ ഒറ്റയ്ക്ക് ഇരിക്കുകയായിരുന്നു. ആകാശത്ത് നിറയെ നക്ഷത്രങ്ങൾ. അകലെ പാടങ്ങളിൽ തവളകളുടെ ശബ്ദം… കമല പതുക്കെ അവന്റെ അടുത്ത് വന്നു. "മോനേ..." "എന്താ അമ്മേ" "എന്നോട് നീ എന്തെങ്കിലും ഒളിക്കുന്നുണ്ടോ" ലോകേഷ് ചെറുതായി പുഞ്ചിരിച്ചു. "അമ്മയോട് ഒളിക്കാൻ എന്താ ഉള്ളത്".. "നീ ചിരിക്കുമ്പോൾ പോലും അമ്മയ്ക്ക് മനസ്സിലാകും... നിന്റെ മനസ്സിൽ എന്തോ വേദനയുണ്ടെന്ന്." അവൻ കുറച്ചു നേരം മിണ്ടാതെ ആകാശത്തേക്ക് നോക്കി… "അമ്മേ... ആരെയും കുറ്റം പറയാൻ പറ്റില്ല.".. "എന്നാലും..." "അവൾക്ക് അവളുടെ ജീവിതം തിരഞ്ഞെടുക്കാനുള്ള അവകാശമുണ്ട്. അതിന് ഞാൻ ഒരിക്കലും എതിരല്ല.".. കമലയുടെ കണ്ണുകൾ നിറഞ്ഞു. "പക്ഷേ എന്റെ മോന് വേദനയായില്ലേ" ലോകേഷ് ഒരു ദീർഘനിശ്വാസമെടുത്തു… "വേദനയുണ്ട്... പക്ഷേ അത് കാലം മാറ്റും.".. അമ്മയുടെ കൈ അവൻ തന്റെ കൈയിൽ ചേർത്തുപിടിച്ചു… "എന്നോടൊപ്പം അമ്മയും അച്ഛനും ഉണ്ടല്ലോ... എനിക്ക് അതു മതി."... വീടിനുള്ളിൽ നിന്ന് ഇതെല്ലാം കേട്ടുനിന്ന കേശവന്റെ കണ്ണുകളും നിറഞ്ഞു… ആ രാത്രി അദ്ദേഹത്തിനു ഉറക്കം വന്നില്ല… വീട്ടുമുറ്റത്ത് നടന്നു കൊണ്ടിരിക്കെ മനസ്സിൽ ഒരു ചിന്ത മാത്രം… "ഇവനെ ജീവിതത്തിൽ ആരും ചെറുതാക്കി കാണാൻ പാടില്ല.".. പിറ്റേന്ന് രാവിലെ ലോകേഷ് പതിവിലും നേരത്തെ എഴുന്നേറ്റു പാടത്തേക്ക് പോകാൻ ഇറങ്ങി.. "ഇന്ന് ഇത്ര നേരത്തെ" കേശവൻ ചോദിച്ചു. "ഒരുപാട് പണിയുണ്ട് അച്ഛാ… നമ്മൾ രണ്ടുപേരല്ലേ ഉള്ളൂ." ലോകേഷ് അച്ഛനെ നോക്കി ചിരിച്ചു. "അതുകൊണ്ട് ... നമ്മുടെ ജീവിതം നമുക്ക് തന്നെ പണിയണം." ലോകേഷിന്റെ ആ വാക്കുകൾ കേശവന് പുതിയൊരു പ്രതീക്ഷ നൽകി. --- അന്ന് പാടത്ത് ജോലി ചെയ്യുന്നതിനിടെ ലോകേഷ് കേശവനെ വിളിച്ചു.. "അച്ഛാ..." "പറ മോനേ." "നമുക്ക് നമ്മുടെ കൃഷിരീതി ഒന്ന് മാറ്റിയാലോ"... "എന്താ ഉദ്ദേശിക്കുന്നത്".. കേശവന് അവൻ എന്താ പറയുന്നത് എന്ന് മനസ്സിലായില്ല… "നെല്ല് മാത്രം കൃഷി ചെയ്താൽ മതിയാകില്ല. പച്ചക്കറിയും വാഴയും ചേർത്താൽ വരുമാനം കൂടും.".. കേശവൻ അതിശയത്തോടെ മകനെ നോക്കി. "ഇതൊക്കെ ആരാ പറഞ്ഞുതന്നത്".... "കഴിഞ്ഞ ആഴ്ച കൃഷി ഓഫീസിൽ പോയപ്പോൾ കേട്ടതാണ്.".. "അപ്പോൾ നീ അവിടെ പോയിരുന്നോ" "അതെ." കേശവന്റെ മുഖത്ത് അഭിമാനം തെളിഞ്ഞു. പഠനം നിർത്തിയെങ്കിലും കൃഷിയെ പറ്റി പഠിക്കാനുള്ള ആഗ്രഹം മകൻ കൈവിട്ടില്ലെന്ന് അദ്ദേഹത്തിന് മനസ്സിലായി. --- അടുത്ത ദിവസങ്ങളിൽ ലോകേഷിന്റെ ജീവിതത്തിൽ ഒരു മാറ്റം പ്രകടമായി. അവൻ വെറുതെ സമയം കളഞ്ഞില്ല. അടുത്തുള്ള കർഷകരെ കണ്ടുമുട്ടി. കൃഷിയെക്കുറിച്ചുള്ള പുസ്തകങ്ങൾ വായിച്ചു. കൃഷി ഓഫീസിൽ പോയി ഉദ്യോഗസ്ഥരോട് സംശയങ്ങൾ ചോദിച്ചു. പുതിയ രീതികൾ മനസ്സിലാക്കാൻ ശ്രമിച്ചു. ഗ്രാമത്തിലെ ചിലർ അത് കണ്ടു പരിഹസിച്ചു… "ഇവൻ വലിയ കൃഷി ഓഫീസർ ആകാൻ പോകുകയാണോ" "പഠിച്ചില്ലെങ്കിലും വലിയ ബുദ്ധിയുണ്ടെന്ന് ആണ് വിചാരം..." ലോകേഷ് അത് കേട്ടു. പക്ഷേ അവൻ അതിന് മറുപടി പറഞ്ഞില്ല. --- വൈകുന്നേരം വീട്ടിലേക്ക് മടങ്ങുമ്പോൾ ഗോപാലൻ മാഷ് അവനെ വിളിച്ചു. "ലോകേഷേ...".. "പറയൂ മാഷേ ." "നിന്നെക്കുറിച്ച് പലരും പലതും പറയുന്നുണ്ട്."... "പറയുന്നവർ പറയട്ടെ മാഷേ ."ലോകേഷ് ചിരിച്ചു. "നിനക്ക് അത് കേട്ട് വിഷമമില്ലേ".. "മാഷേ ... ആളുകളുടെ വായ അടയ്ക്കാൻ എനിക്ക് പറ്റില്ല. പക്ഷേ എന്റെ ചെവി എന്ത് കേൾക്കണമെന്ന് തീരുമാനിക്കാൻ എനിക്ക് പറ്റും.".. ഗോപാലൻ മാഷ് അവന്റെ തോളിൽ കൈവച്ചു. "നിന്റെ അച്ഛനെ പോലെ ആണെന്ന് ഓരോ ദിവസവും നീ തെളിയിക്കുകയാണ്.".. --- അതേസമയം വൈദേഹി വീണ്ടും നഗരത്തിലേക്ക് മടങ്ങിയിരുന്നു. കോളേജിലെ അവസാന വർഷം. അവളുടെ ചുറ്റും സുഹൃത്തുക്കൾ പുതിയ സ്വപ്നങ്ങൾ. "നിന്റെ വിവാഹം ഉറപ്പിച്ചിരുന്നില്ലേ" ഒരു ദിവസം സുഹൃത്ത് ചോദിച്ചു. വൈദേഹി അല്പം അസ്വസ്ഥയായി. "അത് ഞാൻ വേണ്ടെന്ന് പറഞ്ഞു." "എന്തുകൊണ്ട്" "അവന് ഒന്നുമില്ല."... "ഒന്നുമില്ല എന്നുവെച്ചാൽ " "നല്ല ജോലി ഇല്ല... വലിയ വിദ്യാഭ്യാസമില്ല... പണമില്ല."... "അങ്ങനെയാണെങ്കിൽ നീ വലിയ ഒരു ഉദ്യോഗസ്ഥനെയോ ബിസിനസുകാരനെയോ തന്നെ വിവാഹം കഴിക്കും." സുഹൃത്ത് ചിരിച്ചുകൊണ്ട് പറഞ്ഞു… "അതെ... എനിക്ക് അതിലും കുറവ് ഒന്നും വേണ്ട." വൈദേഹിയും ആത്മവിശ്വാസത്തോടെ പറഞ്ഞു… --- കരിമ്പനക്കാവിൽ ലോകേഷ് തന്റെ കൈകളിൽ മണ്ണ് പുരട്ടി നിന്നു. അവൻ മനസ്സിൽ ഒരു പ്രതിജ്ഞ എടുത്തിരുന്നു. "ആരെയും തോൽപ്പിക്കാനല്ല ഞാൻ ജീവിക്കുന്നത്... എന്നെ വിശ്വസിക്കുന്ന അച്ഛനും അമ്മയ്ക്കും അഭിമാനമായി ജീവിക്കാനാണ്… ഞാൻ പ്രതികാരം ചെയ്യില്ല. ആരെയും വെറുക്കില്ല.പക്ഷേ സ്വന്തം ജീവിതം തന്റെ അധ്വാനത്തിലൂടെ ഉയർത്തിക്കാണിക്കും. അതാണ് തന്റെ മറുപടി.”.. അവന്റെ ആ തീരുമാനം അറിയാതെ തന്നെ അവന്റെ ജീവിതത്തിന്റെ വഴിത്തിരിവായി മാറാൻ പോകുകയായിരുന്നു… തുടരും.. ✍️സന്തോഷ്‌ ശശി…. #കഥ,ത്രില്ലെർ,ഹൊറർ #💞 പ്രണയകഥകൾ #✍ തുടർക്കഥ #📙 നോവൽ #📔 കഥ