#📙 നോവൽ - കാശിയുടെ പെണ്ണ് 💐💐 🔻 പാർട്ട്_ 75 ✍️രചന - ജിഫ്ന നിസാർ 💥 ഞാനാണത് ചെയ്യിപ്പിച്ചതെന്ന് നിനക്ക് സംശയമുണ്ടോ മഹി.. " നെഞ്ചിൽ തുളച്ചു കയറുന്നൊരു നോട്ടത്തോടെ അശോകനത് ചോദിക്കുമ്പോൾ അങ്ങനൊരു സംശയം തീർക്കാൻ തന്നെയാണ് അയാളെ തേടി വന്നതെങ്കിലും മഹേഷോന്നു വിളറി പോയി. "സത്യം പറഞ്ഞോ ഡാ.. ഉണ്ടോ.നിന്റെ ചോദ്യങ്ങളിൽ എല്ലാം അങ്ങനൊരു സംശയത്തിന്റെ നിഴൽ ഒളിഞ്ഞു കിടപ്പുണ്ട്.. നീ അറിഞ്ഞോ അറിയാതെയോ.." മഹേഷിന്റെ മുഖം കണ്ടിട്ടൊരു ചിരിയോടെയാണ് അശോകൻ ചോദിച്ചതും. "അതല്ലങ്കിൾ.. ഞാൻ.. വെറുതെ.." പെട്ടന്നൊരുത്തരം പറയാൻ അവനും പറ്റിയില്ല. "നിനക്കെന്നല്ല.. ഞാനും കാശിയും തമ്മിലുള്ള ബന്ധം അറിയാവുന്ന ആർക്കും അങ്ങനൊരു സംശയം തോന്നും മഹി. സ്വാഭാവികം.." അശോകൻ അവന്റെ നേരെ നോക്കി.. "പക്ഷേ.. ഈ കാര്യത്തിൽ അവന് വേണ്ടി ഞാൻ ഒന്നും ചെയ്തിട്ടില്ല." അത് പറയുമ്പോൾ അയാൾക്കൊരു കുറ്റബോധമുണ്ടോ എന്നായിരുന്നപ്പോൾ മഹേഷിന്റെ ഉള്ള് നിറയെ. എങ്കിലും അവനത് അയാളോട് തുറന്നു ചോദിച്ചില്ല. "ചെയ്യേണ്ടതായിരുന്നു. അവനെ രക്ഷിക്കേണ്ടത് എന്റെ ഉത്തരവാദിത്തം തന്നെയായിരുന്നു.അവനോട് ഞാൻ ഇങ്ങനൊരു അവഗണന ചെയ്യാൻ പാടില്ലായിരുന്നു. എന്നിട്ടും ഞാനത് ചെയ്തത്... ആരെയും പേടിച്ചിട്ടല്ല മഹി.." കടുത്തു പോയ അയാളിലെ സ്വരത്തിൽ ഒരു കുറ്റപ്പെടുത്തൽ കൂടി ഉണ്ടോ എന്ന് മഹേഷിന് തോന്നി. അത്രക്കുണ്ടാ മുഖത്തെ കനം. താൻ വന്നതും കാശിയുടെ റിലീസിനെ കുറിച്ച് ചോദിച്ചതുമൊന്നും അയാൾക്കത്ര പിടിച്ചിട്ടില്ല എന്നത് പോലൊരു ഭാവം. വരണ്ടായിരുന്നു എന്ന് തന്നെയായിരുന്നു അപ്പോൾ മഹേഷിനും തോന്നിയത്. അവന് സ്റ്റീഫനോട്‌ ചെറുതല്ലാത്തൊരു നീരസം തോന്നി. അയാളാണ് ഇങ്ങനൊരു സംശയം തന്റെ ഉള്ളിലേക്ക് കുത്തി നിറച്ചത്. നേരിട്ട് ഇങ്ങോട്ട് വരാതെ അശോകനാണോ കാശിയുടെ റിലീസിന് പിന്നിലെന്നറിയാൻ തനിക്ക് മുന്നിൽ വേറെയും മാർഗങ്ങൾ ഉണ്ടായിരുന്നു. പക്ഷേ നേരിട്ട് പോയാൽ മാത്രമേ അയാളുടെ കള്ളത്തരം മനസ്സിലാകൂ എന്ന് കൂടി സ്റ്റീഫൻ പറഞ്ഞപ്പോൾ.. അതിനായി അയാൾ നിർബന്ധിച്ചത് പോലെ പറഞ്ഞപ്പോൾ അതാണ് നല്ലതെന്ന് തനിക്കും തോന്നി പോയി. "എന്റെ ബസ്സാണ്. അതിനൊരു തട്ട് കേട് വന്നാൽ തീർച്ചയായും ഞാൻ തന്നെയാണ് അത് പരിഹരിക്കേണ്ടത്. ഇതിപ്പോ കാശി ബസ്സിൽ വെച്ചങ്ങനെ ഒരു നെറികെട്ട പണി ചെയ്യില്ലെന്ന് മറ്റാരെക്കാളും എനിക്കറിയാം മഹി. എന്നിട്ടും അവന് വേണ്ടി ഞാനൊന്നും ചെയാഞ്ഞത്.." അത്രയും പറഞ്ഞു കൊണ്ടൊന്നു നിർത്തി അയാൾ മഹേഷിനെ നോക്കി.. "എന്റെ മോളെ കുറിച്ചോർത്തു കൊണ്ടാണ്.. അവളുടെ ലൈഫ് സേഫ് ആക്കാൻ വേണ്ടിയാണ്. നിന്നെ അവളെ ഏൽപ്പിച്ച പിന്നെ ഏറ്റവും ആദ്യമായി ഞാൻ അവനെ ചെന്നിറക്കി കൊണ്ട് വരുക എന്നതാണ്. അതിനിനി എത്ര കാശ് ചെലവായാലും ആരൊക്കെ തടഞ്ഞാലും അതെനിക്ക് പ്രശ്നമേ അല്ല.." തന്റെ മനസ്സിലെ തെറ്റ് ധാരണ നീക്കാൻ വേണ്ടിയാണ് അയാൾ അത്രയും വലിയൊരു വിശദീകരണം തന്നതെന്ന് മഹേഷിനറിയാം. അത് കൊണ്ട് തന്നെ അയാൾ പറയുന്നതെല്ലാം കേട്ടിരുന്നു എന്നല്ലാതെ അവനൊന്നും പിന്നെ മിണ്ടാനായില്ല. അവന്റെയാ ബുദ്ധിമുട്ട് മനസ്സിലാക്കി കൊണ്ടാണ് പിന്നെ അതിനെ കുറിച്ചൊന്നും പറയാതെ അശോകൻ തന്റെ സംസാരം വഴി തിരിച്ചു വിട്ടതും.. അപ്പോഴും രണ്ടു പേരുടെ ഉള്ളിലും പുകയുന്ന ആ ചോദ്യം.. കാശിയെ ഇറക്കിയത് പിന്നെ ആരാണ്..? എന്തിന് വേണ്ടിയാണ് പുറത്തിറങ്ങി രണ്ടു ദിവസങ്ങൾക്ക് ശേഷവും അവനത് ആരെയും അറിയിക്കാഞ്ഞത്.? 💥💥 ഇത് പ്രശ്നമാകും സാറേ.." കൂട്ടത്തിൽ പ്രാധാനിയായ സിജോ ഓർമപ്പെടുത്തുമ്പോൾ സ്റ്റീഫന്റെ ചുണ്ടിലൊരു ചിരിയുണ്ട്. "അവനെ വിട്ടേക്ക്.. മഹേഷിനെ.അതത്ര ഭീകരൻ ഒന്നുമല്ല. കാശ് കണ്ടാൽ കണ്ണ് മഞ്ഞളിക്കുന്ന വെറുമൊരു ബിസിനസ് കാരൻ. പക്ഷേ മറ്റെയാ പുള്ളിയുണ്ടല്ലോ.. അമ്പലപറമ്പിൽ അശോകൻ.. അയാളെ പേടിക്കുക തന്നെ വേണം.. മുൻ അനുഭവങ്ങൾ സാറിന് ധാരളം ഉണ്ടല്ലോ. എന്നിട്ടും പിന്നെ ഇങ്ങനെ ഒരു കളി.. അതും അവർക്കിടയിൽ അവർ അറിയാതെ.. പിടിക്കപ്പെട്ടാൽ.. പണി പാലും വെള്ളത്തിൽ കിട്ടും " ഒരല്പം നീരസം കൂടിയുണ്ട് അയാളത് പറയുമ്പോൾ. കാരണം അമ്പലപറമ്പിൽ അശോകനെ കുറിച്ചയാൾക്ക് എല്ലാം അറിയാം എന്നുള്ളത് തന്നെ. സ്റ്റീഫന്റെ മുഖവും കടുത്തു പോയിരിക്കുന്നു അതോർമ്മിപ്പിച്ചത് മുതൽ. "എനിക്കറിയാ ഡാ സിജോ. എല്ലാം അറിഞ്ഞിട്ട് തന്നെയാ ഞാൻ അവന്റെ.. മഹേഷിന്റെ കൂടെ കൂടിയത്. " ക്രൂരത നിറഞ്ഞൊരു ചിരിയോടെ സ്റ്റീഫൻ ഒന്ന് തല തടവി.. "കാശിനാഥനെ ഞാനാണ് ജാമ്യത്തിൽ ഇറക്കിയെന്നത് മഹേഷും അവന്റെ മാമനും മഷിയിട്ട് നോക്കിയ കണ്ട് പിടിക്കാൻ പറ്റത്തില്ല. അതെനിക്കുറപ്പുണ്ട്. അതിന് വേണ്ടതെല്ലാം ഞാൻ ചെയ്തു കഴിഞ്ഞു.. എന്തിന്... ഞാനാണ് പുറത്തിറങ്ങാൻ സഹായിച്ചതെന്ന് അവന് പോലും അറിയില്ല.. ആ കാശിനാഥന്..പോലും." അതും പറഞ്ഞിട്ട് സ്റ്റീഫാനോന്നുറക്കെ ചിരിച്ചു. "വക്കീൽ സത്യമൂർത്തി അയാളുടെ റോൾ വളരെ നന്നായി ചെയ്തു കഴിഞ്ഞു. കാശിനാഥന്റെ ജാമ്യത്തിന്റെ റെക്കോർഡ് ഫയലിൽ അയാളെഴുതി ചേർത്തത് തീർച്ചയായും എന്നെ സേവ് ചെയ്യാനുള്ളത് തന്നെയാണ്. അതിന് വേണ്ട ലക്ഷങ്ങൾ മൂർത്തിയുടെ അകൗണ്ടിലേക്ക് സേഫായി എത്തുകയും ചെയ്തു.." സ്റ്റീഫൻ തല ചെരിച്ചു കൊണ്ട് സിജോയെ നോക്കി. ചതിയുടെ നീല വെളച്ചമാണപ്പോൾ അയാളുടെ കണ്ണുകളിൽ.. സിജോയുടെ ആശങ്കകളും അൽപ്പം അയവ് വന്നിരിക്കുന്നു. "മഹേഷും അശോകനും ജോഡികളായ പിന്നെ എനിക്കെന്താ സിജോ അവിടെ റോൾ..കാശിനാഥനോളം അശോകനെ പ്രൊട്ടക്ട് ചെയ്യാൻ മഹേഷിന് പറ്റില്ല.അതൊക്കെ ശരി തന്നെ.. പക്ഷേ അവർ തമ്മിൽ ജോയിന്റ് ആവാനും പാടില്ല.. അതിനുള്ള വഴിയാണ് കാശിനാഥന്റെ ഈ ജാമ്യം. അത് അശോകൻ തന്നെയാണ് ചെയ്യിപ്പിച്ചതെന്ന് മഹേഷ്‌ ഏറെക്കുറെ ഉറപ്പിച്ച പോലാണ്.. എന്താ അതിന് കാരണം.. ഏഹ്.." ചിരിയോടെ സ്റ്റീഫൻ പിന്നെയും സിജോയെ നോക്കി. "സർ കാരണം.. സാറല്ലേ അങ്ങനൊരു സംശയത്തിന്റെ തീ പൊരി അവന്റെ ഉള്ളിർലെക്കിട്ട് കൊടുത്തത്.." സിജോ ഗൂഡമായൊരു ചിരിയോടെ സ്റ്റീഫനെ നോക്കി. "അതേ... ആ തീ പൊരി ഊതി ഞാനൊരു വലിയ സംശയത്തിന്റെ തീ പിടുത്തമാക്കി മാറ്റുമെടാ. എന്നിട്ടാ തീയിൽ അമ്മാവനെയും മരുമോനെയും ഞാൻ ഒന്നിച്ചു കത്തിക്കും.." സ്റ്റീഫൻ വീണ്ടും ഉറക്കെ ചിരിച്ചു.. "പിന്നെ കാശിനാഥൻ.. അവനെ എങ്ങനെ ഒതുക്കണമെന്നും ഞാൻ പ്ലാൻ ചെയ്ത് കഴിഞ്ഞു.. അശോകൻ മകളെ മഹേഷിന് കെട്ടിച്ചു കൊടുക്കുന്നതോടെ..കാശിയുടെ ഉള്ളിൽ അയാളുടെ ഇപ്പോഴുള്ള സ്ഥാനം പോകും. പിന്നെ ഈ കേസ്.. ഇതിനു വേണ്ടി അശോകൻ ഒന്നും ചെയ്തിട്ടില്ല. അതും അവനറിയാം..തീർച്ചയായും അവനത് പ്രതീക്ഷിക്കുന്നുണ്ടാവും..അതിന്റെ ദേഷ്യവും അവന് കാണും.ആ രണ്ടു ദേഷ്യവും അവനിൽ വളർത്തണം. മഹേഷിനോടും അശോകനോടും പിന്നെ അവന് ദേഷ്യമാവും.. മൊത്തത്തിൽ അവരങ്ങനെ കലങ്ങി മറിഞ്ഞു കിടക്കുമ്പോൾ ആ കടലിൽ ഞാനൊരു വലയുമായി ഇറങ്ങി.. മുത്തും പവിഴവും വാരും.. വാരിക്കോരി സ്വന്തമാക്കും " ഉന്മാദം പൂണ്ടു കൊണ്ടുള്ള സ്റ്റീഫന്റെ ചിരി.. അപ്പോൾ അതിനൊരു അട്ടഹാസത്തിന്റെ രൂപമായിരുന്നു.. 💥💥 കാശി..എടാ നീ ഞാൻ പറയുന്നതൊന്ന് കേൾക്ക്.. " ശിവ പിടിക്കും മുന്നേ കാശി അവന്റെ കൈകൾ കുടഞ്ഞു മാറ്റി. "നീയിനി എന്ത് കോപ്പ് പറയാനാടാ.. ഇത്രയൊക്കെ ചെയ്ത് കൂട്ടിയിട്ടും ഇനിയും ഞാൻ നിന്റെ ന്യായം കേട്ടിരിക്കണോ.. ഏഹ്..എന്റെ പട്ടി കേൾക്കും.." നിയന്ത്രിക്കാൻ കഴിയാത്ത ദേഷ്യത്തോടെ കാശി വീണ്ടും ശിവയെ പിടിച്ചു തള്ളി. ശിവ ഇനിയെന്ത് പറഞ്ഞിട്ടവന്റെ ദേഷ്യം ഒതുക്കി നിർത്തും എന്നറിയാതൊരു നിസ്സഹായതയോടെ ചുവരിൽ ചാരി. "കുറച്ചു നാള് അകത്തു കിടക്കേണ്ടി വന്നേക്കും. അതിൽ കൂടുതൽ ഒരു ചുക്കും സംഭവിക്കില്ലായിരുന്നു. തെറ്റ് ചെയ്തിട്ടില്ല എന്നുള്ള ചങ്കൂറ്റത്തോടെ തന്നെ ഞാനത് ചെയ്യും.ഇനിയിപ്പോ ജീവിതം മുഴുവനും ജയിലിൽ തന്നെ കിടക്കേണ്ടി വന്നാലും അവനിറക്കിയിട്ട് എനിക്കിറങ്ങേണ്ടിയിരുന്നില്ല ശിവ.. എനിക്ക് വേണ്ടി ആ പിശാചിനെ പോയി കണ്ടപ്പോഴും എന്റെ മനസ്സ് നിനക്കറിയാൻ കഴിഞ്ഞില്ലല്ലോ.. ഡാ. അവനെ പോലൊരു വൃത്തി കെട്ടവൻ ഇങ്ങനൊക്കെ തന്നെ അല്ലേ ചെയ്യൂ.. അതറിഞ്ഞും അങ്ങോട്ട് കൊണ്ട് പോയി തല വെച്ച് കൊടുത്തു നീ...എന്നിട്ടോടുവിൽ നാണം കെട്ട് തല കുനിച്ചു കൊണ്ട് ആ നാറിക്ക് മുന്നിൽ നീ. വേണ്ടായിരുന്നു ശിവ.. എന്തൊക്കെ ന്യായം നിനക്ക് പറയാൻ ഉണ്ടായാലും അങ്ങനൊരു കാര്യം നീ ചെയ്യേണ്ടായിരുന്നു. ഇതിപ്പോ.. എനിക്ക്.. എനിക്കാ ജയിലിൽ തന്നെയായിരുന്നു നല്ലത്.." സഹിക്കാൻ കഴിയാത്തൊരു വേദന.. അതങ്ങനെ കാശിയുടെ കണ്ണിൽ ചുവന്നു വിങ്ങി കിടന്നു. "ഞാനായിരുന്നു ഇങ്ങനൊരു ചെയ്യാത്ത തെറ്റിന് ജയിലിൽ പോയതെങ്കിൽ ഇറങ്ങുമ്പോ മതിയെന്ന് പറഞ്ഞു കൊണ്ട് നീ കാത്തിരികുമായിരുന്നോ.." തികച്ചും ശാന്തമായിരുന്നു ശിവയുടെ ചോദ്യം. കാശി അവനെ ഒന്ന് തുറിച്ചു നോക്കി. "പറയെടാ.. നിനക്ക് പറ്റുമായിരുന്നോ..?" നേർത്തൊരു ചിരിയോടെ ശിവ കാശിയുടെ അരികിൽ വന്നിരുന്നു. ഇല്ല.. അല്ലേ.. " മുഖം കുനിച്ച കാശ്ശിയോടത് പറയുമ്പോഴും ശിവ ചിരിച്ചു. "അത്രയുമേ ഞാനും ചെയ്തോള്ളൂ കാശി. എന്റെ ജീവിതമല്ലെടാ ജീവൻ കൊടുക്കേണ്ടി വന്നാലും നിനക്ക് വേണ്ടിയെങ്കിൽ ഞാൻ അത് ചെയ്യും.. കാരണം എനിക്ക് വേണ്ടിയും നീ അങ്ങനെ തന്നെ ചെയ്യുമെന്ന് എനിക്കറിയാം.." പതിഞ്ഞതെങ്കിലും ആ വാക്കുകൾക്കുള്ള ആത്മാർത്ഥ.. അത് അങ്ങേയറ്റമാണ്. കാശി അവനെ നോക്കാതിരുന്നത് കണ്ണ് നിറഞ്ഞതവൻ കാണാതിരിക്കാൻ വേണ്ടിയാണ്. "ചെയ്യാത്ത തെറ്റിന് നീ അകത്തു കിടന്നു നരകിച്ചു കഴിയുമ്പോൾ പുറത്തെനിക്ക് എന്ത് സമാധാനമാണ് പിന്നെ ഉള്ളത്.. ഞാൻ.. ഞാനൊരുപാട് പേരോട് ഹെല്പ് ചോദിച്ചു മടിത്തിട്ടാണ് വിഷ്ണുവിന്റെ അരികിൽ എത്തി പെട്ടത്. അവിടെത്തി കഴിഞ്ഞാണ് ആ ചതിയെ കുറിച്ച് ഞാൻ അറിഞ്ഞതും. വിഷ്ണുവിനെയോ ഭവ്യയെയോ.. എന്തിന് എന്നെയോ എന്റെ ജീവിതത്തെയോ ഞാനപ്പോൾ കണ്ടില്ല ഡാ. നീ പുറത്തിറങ്ങിയാൽ മാത്രമേ എനിക്കൊന്ന് നേരെ ചൊവ്വേ ശ്വാസമെടുക്കാൻ പറ്റൂ.. പിന്നെ വിഷ്ണുവാണ് എതിരെ..അവനെന്തു നെറികെട്ട കളിയും നടത്തും. ഇങ്ങനൊരു കാര്യത്തിന് ഞാൻ പിടിക്കപ്പെട്ടാൽ.. അത്.. അച്ഛനും അമ്മയും അമ്മുവും.. ഇത്രയുമൊക്കെയേ കാശി ഞാനപ്പോൾ ഓർത്തൊള്ളൂ.. പക്ഷേ അവിടെയും അവനെന്നെ ചതിച്ചു. നീ പറഞ്ഞത് പോലെ ആ പിശാചിനെ ഞാൻ വിശ്വസിക്കാൻ പാടില്ലായിരുന്നു.." നിരാശയിൽ ശിവ പറഞ്ഞു നിർത്തിയ നിമിഷം.. ഉടുത്തിരുന്ന മുണ്ടിന്റെ തുമ്പൊന്നുയർത്തി മുഖമമർത്തി തുടച്ചു കൊണ്ട് കാശി എഴുന്നേറ്റു. ശിവയോട് ഒരക്ഷരം മിണ്ടാതെ അവൻ ഓടിയിറങ്ങി നേരെ തന്റെ ബുള്ളറ്റിന്റെ അരികിലേക്കാണ് ചെന്നത്.. എന്താണവന്റെ ഉദ്ദേശമെന്ന് ശിവ തിരിച്ചറിയും മുന്നേ കാശി പുറത്തേക്ക് കുതിച്ചിരുന്നു... തുടരും... എങ്ങോട്ടാണോ എന്തോ.. 😁 പോയേച്ചും വരട്ടെ ല്ലേ 😎 റിവ്യൂ ഇട്ടേക്കണേ.. ഡെയിലി പോസ്റ്റ്‌ ആവുമ്പോ റിവ്യൂ നല്ലത് പോലെ കുറയും 😁 സ്നേഹത്തോടെ jif💐 #📔 കഥ #💞 പ്രണയകഥകൾ