#📙 നോവൽ #🧟 പ്രേതകഥകൾ! #✍ തുടർക്കഥ #✍️ വട്ടെഴുത്തുകൾ #📔 കഥ അറക്കവാൾ ആദർശൻ 3 ( Not A Sequel, Inspired From Texas chainsaw massacre കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) ……………………………………. 1986-ലെ കഠിനമായ കർക്കിടക മാസത്തിലെ ഒരു പ്രളയരാത്രിയിലാണ് ഇടുക്കി കട്ടപ്പനയിലെ മലഞ്ചെരുവിൽ ചോര മണക്കുന്ന ആ പഴയ കശാപ്പുശാലയിൽ ആദർശൻ ജനിക്കുന്നത്. കനത്ത മിന്നൽപ്പിണരുകൾ ആകാശത്തെ കീറിമുറിച്ച ആ ഇരുണ്ട നിമിഷത്തിൽ പ്രസവവേദന കൊണ്ട് പിടഞ്ഞു മരിച്ച ഒരജ്ഞാത സ്ത്രീയുടെ ഉദരത്തിൽ നിന്നാണ് അവൻ ഈ ഭൂമിയിലേക്ക് കണ്ണുതുറന്നത്. കശാപ്പുശാലയിലെ ക്രൂരനായ മാനേജർ വേണു ആ കുഞ്ഞിന്റെ കരച്ചിൽ കേട്ട് അറപ്പോടെ അതിനെ ഒരു പഴയ ചാക്കിൽ കെട്ടി കവലയിലെ അറവുമാലിന്യങ്ങളും മൃഗങ്ങളുടെ എല്ലിൻകഷ്ണങ്ങളും തള്ളുന്ന ആഴമേറിയ കുഴിയിലേക്ക് എറിഞ്ഞു കളഞ്ഞു . . ചതുപ്പിലെ ചോരവെള്ളത്തിൽ കിടന്ന് ആ കുഞ്ഞ് മരിക്കേണ്ടതായിരുന്നു എന്നാൽ അട്ടപ്പാടിയിൽ നിന്നും ഹൈറേഞ്ചിലേക്ക് കുടിയേറിയ ഗീത എന്ന സ്ത്രീ അന്ന് രാത്രി ആ വഴി വരികയും ടോർച്ചിന്റെ വെളിച്ചത്തിൽ ആ ചളിമണ്ണിൽ കിടക്കുന്ന കുഞ്ഞിനെ കണ്ടെത്തുകയും ചെയ്തു. നാട്ടുകാർ രാക്ഷസി ഗീത എന്ന് വിളിച്ചിരുന്ന, ഒരൊറ്റയാനെപ്പോലെ ജീവിച്ചിരുന്ന ആ സ്ത്രീക്ക് അന്ന് ആ കുഞ്ഞിനോട് തോന്നിയത് ദയയല്ല, മറിച്ച് തന്റെ വലിയ വീട്ടിലെ ഏകാന്തത മാറ്റാൻ പറ്റിയ ഒരു ജീവനുള്ള കളിപ്പാവയെ കിട്ടിയ സന്തോഷമായിരുന്നു. അവർ അവനെ നെഞ്ചോട് ചേർത്ത് തന്റെ വലിയ തറവാട്ടിലേക്ക് കൊണ്ടുപോയി ആദർശൻ എന്ന് പേരിട്ടു വളർത്തി. വളർന്നു വലുതായപ്പോൾ ആദർശൻ ആളൊരു സൗമ്യനായിരുന്നു എങ്കിലും അസാധാരണമായ ശരീരവടിവും പേടിപ്പിക്കുന്ന കണ്ണുകളും അവനെ മറ്റുള്ളവരിൽ നിന്ന് വ്യത്യസ്തനാക്കി. അവന് സംസാരിക്കാൻ അറിയില്ലായിരുന്നു എന്നതായിരുന്നു ഏറ്റവും വലിയ പ്രത്യേകത. പകരമായി അവൻ തന്റെ തൊണ്ടയിൽ നിന്ന് വിചിത്രമായ ശബ്ദങ്ങൾ പുറപ്പെടുവിച്ചു. വീട്ടിലെ പഴയ മിക്സി കറങ്ങുന്ന ഒച്ചയും ആട്ടിൻകുട്ടികളുടെ കരച്ചിലും കാട്ടുപന്നിയുടെ അലർച്ചയും അവൻ ഒരേ സമയം അനുകരിച്ച് നാട്ടുകാരെ മൊത്തം കൺഫ്യൂഷനിലാക്കി . പലപ്പോഴും രാത്രികളിൽ കട്ടപ്പന കവലയിലൂടെ പോകുന്നവർ കേൾക്കും, തറവാട്ടിനുള്ളിൽ നിന്ന് അഞ്ചാറ് ആടുകൾ ഒന്നിച്ച് കരയുന്നതും, തൊട്ടുപിന്നാലെ ഒരു കാട്ടുപന്നി അലറുന്നതും! കള്ളന്മാർ പോലും ആ വീടിന്റെ വശത്തേക്ക് തിരിഞ്ഞുനോക്കാൻ ഭയന്നു. …….. കാലങ്ങൾ ഒരുപാട് കടന്നുപോയി ആദർശന് മുപ്പത് വയസ്സായപ്പോഴേക്കും അമ്മ ഗീതയ്ക്ക് കടുത്ത പ്രമേഹം ബാധിച്ചിരുന്നു. മധുരം കഴിക്കാൻ പാടില്ലെന്ന് ഡോക്ടർമാർ കർശനമായി പറഞ്ഞിരുന്നെങ്കിലും ഗീത ഒളിച്ചിരുന്ന് ലഡുവും ജിലേബിയും ചായയിൽ അഞ്ചാറ് സ്പൂൺ പഞ്ചസാരയുമൊക്കെ ഇട്ട് കഴിക്കുന്നത് ഒരു ശീലമാക്കി മാറ്റിയിരുന്നു. മകനായ ആദർശൻ തന്റെ വിചിത്രമായ ഒച്ചകൾ ഉണ്ടാക്കി എത്ര തടയാൻ ശ്രമിച്ചിട്ടും അവർ അത് കേട്ടതായി ഭാവച്ചില്ല. "എടാ ആദർശാ, നിന്റെ അമ്മ ചാവാൻ പോകുമ്പോഴും രണ്ട് ലഡു തിന്നിട്ടേ ചാകൂ!" ഗീത ചിരിച്ചുകൊണ്ട് പറയുമായിരുന്നു. അങ്ങനെ ഒരു ദിവസം കട്ടപ്പന തറവാട്ടിലെ ഉമ്മറത്തെ കസേരയിലിരുന്ന് മധുരം അമിതമായി കഴിച്ച് ഷുഗർ ലെവൽ സകല പരിധികളും കടന്ന് ഗീത ഈ ലോകത്തോട് വിടപറഞ്ഞു. മരണസമയത്ത് അവരുടെ ചുണ്ടിൽ ഒരു ജിലേബിയുടെ കഷ്ണം ബാക്കിയുണ്ടായിരുന്നു. അമ്മയുടെ അപ്രതീക്ഷിത മരണം ആദർശന്റെ ഉള്ളിലെ സമാധാനപ്രിയനെ പൂർണ്ണമായും ഇല്ലാതാക്കുകയും അവന്റെ മാനസികനില തെറ്റിക്കുകയും ചെയ്തു. അമ്മയുടെ ശവസംസ്കാരം കഴിഞ്ഞ് വലിച്ച് വാരിയിട്ട മിഠായിക്കവറുകൾ നോക്കി അവൻ മണിക്കൂറുകളോളം ഒരു മിക്സി കറങ്ങുന്ന ശബ്ദമുണ്ടാക്കി കരഞ്ഞു. ……… 2016-ൽ തന്റെ ഉള്ളിലെ ദുഃഖവും ഭ്രാന്തും മറക്കാൻ അവൻ വീണ്ടും അതേ കശാപ്പുശാലയിൽ തന്നെ ജോലിക്ക് കയറി; താൻ ജനിച്ച, തന്റെ അമ്മ മരിച്ചുവീണ അതേ കശാപ്പുശാല. മാംസം മുറിക്കുന്നതിൽ അവൻ അതീവ വിദഗ്ദ്ധനായിരുന്നു എങ്കിലും അവന്റെ കണ്ണുകളിൽ പഴയ സൗമ്യത ഇല്ലായിരുന്നു. മൃഗങ്ങളെ കൊല്ലുമ്പോൾ അവൻ ഉണ്ടാക്കിയിരുന്ന ശബ്ദങ്ങൾ കേട്ട് കൂടെയുള്ള അറവുകാർ പോലും ഞെട്ടി. അക്കാലത്ത് കട്ടപ്പനയിലെ മാംസവ്യാപാരികൾക്കിടയിൽ ആദർശന്റെ കശാപ്പുശാലയ്ക്ക് ഒരു പ്രത്യേക പേരുണ്ടായിരുന്നു. "ഇവിടെ കിട്ടുന്ന ഇറച്ചിക്ക് പ്രത്യേക രുചിയാണ്!" എന്നായിരുന്നു ആളുകൾ പറഞ്ഞിരുന്നത്. കാരണം മൃഗങ്ങളുടെ ഇറച്ചിക്ക് പുറമെ, കാട്ടുമൃഗങ്ങളെ രഹസ്യമായി വേട്ടയാടിയുള്ള അസാധാരണമായ വിഭവങ്ങളും ആദർശൻ അവിടെ ഒരുക്കിയിരുന്നു. ലോക്കൽ എസ്‌.ഐ ബിജു ഈ കശാപ്പുശാലയിലെ ഒരു സ്ഥിരം സന്ദർശകനായിരുന്നു. പക്ഷേ, അത് ഡ്യൂട്ടിയുടെ ഭാഗമായിട്ടായിരുന്നില്ല. പകരം, ആദർശന്റെ കയ്യിൽ നിന്നും കിട്ടുന്ന അപൂർവ്വമായ കാട്ടുപോത്തിറച്ചി സൗജന്യമായി വാങ്ങാൻ വേണ്ടിയായിരുന്നു. പോലീസിന്റെ പവർ കാണിച്ച് ഒരു രൂപ പോലും കൊടുക്കാതെ കിലോക്കണക്കിന് ഇറച്ചിയാണ് ബിജു അവിടുന്ന് കടത്തിയിരുന്നത്. ഒരു ദിവസം കട്ടപ്പനയിലെ പുതിയ ഹെൽത്ത് ഇൻസ്പെക്ടർ നിസാർ അവിടെ മിന്നൽ പരിശോധനയ്ക്ക് എത്തി. താൻ ചോദിച്ച കൈക്കൂലി കിട്ടാത്തതിന്റെ ദേഷ്യത്തിൽ നിസാർ കശാപ്പുശാലയുടെ ലൈസൻസ് കാലാവധി കഴിഞ്ഞതാണെന്നും വൃത്തിഹീനമായ അന്തരീക്ഷമാണെന്നും പറഞ്ഞ് അത് പൂട്ടി സീൽ വെക്കാൻ ഉത്തരവിട്ടു. അപ്പോൾ തന്നെ എസ്‌.ഐ ബിജു അവിടുത്തെ പിന്നാമ്പുറത്തെ വാതിലിലൂടെ രഹസ്യമായി അകത്തു കയറിയിട്ടുണ്ടായിരുന്നു. നിസാർ കശാപ്പുശാല പൂട്ടുന്നതിന് മുൻപ് തന്റെ സ്കൂട്ടറിലെ സഞ്ചി നിറയെ ഫ്രീ ഇറച്ചിയുമായി കടന്നുകളയാനായിരുന്നു പുള്ളിയുടെ പ്ലാൻ. സ്ഥാപനം പൂട്ടിയതോടെ വരുമാനം നിലച്ച മാനേജർ വേണു വന്ന് ആദർശനോട് ഇറങ്ങിപ്പോകാൻ ആക്രോശിച്ചു. തന്റെ ഏക ആശ്വാസമായ ജോലി കൂടി പോയ സങ്കടത്തിൽ ആദർശൻ അവിടെ ഉണ്ടായിരുന്ന വലിയൊരു മരത്തടി വെച്ച് മാനേജരുടെ തലയ്ക്ക് ഒരൊറ്റ അടി കൊടുത്തു. മാനേജർ അവിടെത്തന്നെ തലച്ചോറ് തകർന്ന് മരിച്ചുവീണു. തന്റെ ആദ്യത്തെ കൊലപാതകം നടത്തിയ ശേഷം ആദർശൻ കശാപ്പുശാലയുടെ മൂലയിൽ ഇരുന്ന, പോത്തിറച്ചി വെട്ടാൻ ഉപയോഗിക്കുന്ന തുരുമ്പിച്ച വലിയൊരു സ്റ്റീൽ കട്ടിംഗ് മെഷീൻ കൈക്കലാക്കി. ഇനി കട്ടപ്പനയിൽ ചോരപ്പുഴ ഒഴുകാൻ പോവുകയാണെന്ന മുന്നറിയിപ്പ് പോലെ ആ അറക്കവാൾ അവന്റെ കയ്യിൽ കിടന്ന് തിളങ്ങി. ഈ സമയം ബഹളം കേട്ട് ബിജു അങ്ങോട്ട് നടന്നു വന്നു. ചോരയിൽ കുളിച്ചു കിടക്കുന്ന മാനേജരെയും കയ്യിൽ അറക്കവാളുമായി നിൽക്കുന്ന ആദർശനെയും കണ്ട് ബിജു ഭയന്നുവിറച്ചു. വണ്ടിയിൽ വച്ചിരുന്ന ഇറച്ചിയുടെ കാര്യം മറന്ന് ബിജു പുറത്തേക്ക് ഓടി രക്ഷപ്പെടാൻ നോക്കി. തന്റെ വഴിയിൽ തടസ്സമായി നിൽക്കുന്ന ആരെയും ജീവനോടെ വിടില്ലെന്ന ഭാവത്തോടെ ആദർശൻ അവന് നേരെ തിരിഞ്ഞു. ബിജു തന്റെ സർവ്വീസ് റിവോൾവർ പുറത്തെടുക്കാൻ നോക്കിയെങ്കിലും പേടി കൊണ്ട് വിറയ്ക്കുന്ന കൈകളിൽ നിന്ന് തോക്ക് താഴെ ചളിയിലേക്ക് വീണുപോയി. "എടാ ആദർശാ... ഞാൻ ഒന്നും കണ്ടിട്ടില്ലടാ... എന്നെ വിട്..." ബിജു കെഞ്ചി. പക്ഷേ ആദർശൻ തന്റെ അറക്കവാൾ വീശി എസ്‌.ഐ ബിജുവിന്റെ നേരെ പാഞ്ഞുചെന്നു. കശാപ്പുശാലയുടെ ഇരുട്ടിൽ ന്റെ അലർച്ച ആരും കേട്ടില്ല. ആദർശൻ അദ്ദേഹത്തെ അവിടെത്തന്നെ കൊലപ്പെടുത്തി. എസ്‌.ഐയുടെ പോലീസ് യൂണിഫോമും തൊപ്പിയും നക്ഷത്രങ്ങളും അറപ്പോടെ ഊരിയെടുത്ത് അവൻ സ്വന്തം തറവാട്ടിലെ ഉമ്മറത്ത് കൊണ്ടുപോയി ഒരു ഭംഗിക്ക് വെച്ചു. ഹെൽത്ത് ഇൻസ്പെക്ടർ നിസാർ ഇതൊന്നും അറിയാതെ തന്റെ ഔദ്യോഗിക ഡ്യൂട്ടിയുമായി കട്ടപ്പന കവലയിലൂടെ പട്രോളിംഗ് നടത്തുകയായിരുന്നു. ……… ഇതേസമയം കൊച്ചിയിലെ എയർകണ്ടീഷൻഡ് മുറികളിൽ നിന്നും കട്ടപ്പനയിലെ മഞ്ഞും കുളിരും ആസ്വദിക്കാൻ വാഗമണ്ണിലേക്ക് ടൂർ പോവുകയായിരുന്നു ഒരു കൂട്ടം ചങ്കുകളായ സാമുവലും സുരേഷും റെക്സിയും സന്ധ്യയും. "ഡാ സുരേഷേ, കട്ടപ്പനയിലെ മഞ്ഞിൽ നല്ല ചൂടൻ കപ്പയും ബീഫും അടിക്കണം," സാമുവൽ പറഞ്ഞു. "ബീഫോ? അതൊക്കെ അവിടെ ഇപ്പോ കിട്ടുമോ ആവോ,!" സുരേഷ് ചിരിച്ചു. അവനറിയില്ലായിരുന്നു ആ കശാപ്പുശാലയിലെ ഇറച്ചിവെട്ടുകാരൻ തങ്ങളെയും കാത്തിരിക്കുകയാണെന്ന്. അവർ പാട്ടും പാടി ജീപ്പിൽ വരികയായിരുന്ന വഴിയിൽ വെച്ച് ഒരു കട്ട ലോക്കൽ ബുള്ളറ്റ് ഒടിച്ചുവന്ന ഒരു ഫ്രീക്കൻ പയ്യൻ ഇവരുടെ വണ്ടിക്ക് കുറുകെ വെച്ച് അനാവശ്യമായി റേസിന് വന്നു. ഹെൽമറ്റില്ല, കണ്ണിൽ സൺഗ്ലാസ്, ചുണ്ടിൽ ഒരു സിഗരറ്റ്. വണ്ടി മുട്ടാതിരിക്കാൻ ഡ്രൈവർ പെട്ടെന്ന് ബ്രേക്കിട്ടപ്പോൾ ജീപ്പ് നിയന്ത്രണം വിട്ട് റോഡരികിലെ വലിയൊരു താഴ്ചയിലേക്ക് മറിഞ്ഞു. അപകടത്തിന്റെ ആഘാതത്തിൽ റെക്സി തെറിച്ച് ദൂരെ ഒരു വലിയ കാപ്പിത്തോട്ടത്തിന്റെ താഴ്വരയിലേക്ക് വീണു. ബോധം മറഞ്ഞു കിടന്ന റെക്സിയെ ബാക്കിയുള്ളവർ തിരയുന്നതിനിടയിലാണ് ആദർശൻ തന്റെ ചോര പുരണ്ട വസ്ത്രങ്ങളുമായി അവിടെ പ്രത്യക്ഷപ്പെടുന്നത്. ആദർശനെ കണ്ട് ബുള്ളറ്റ് ഫ്രീക്കൻ പയ്യൻ വണ്ടി നിർത്തി അവനോട് തട്ടിക്കയറാൻ നോക്കി: "എന്താടാ നോക്കുന്നത്? വണ്ടിയിൽ വന്ന് മുട്ടിച്ചിട്ട് സീൻ ആക്കുന്നോ?" ആദർശൻ മറുപടിയൊന്നും പറഞ്ഞില്ല. അവൻ തന്റെ കയ്യിലിരുന്ന വലിയൊരു കശാപ്പുകത്തി വെച്ച് അവന്റെ നെറ്റിത്തടത്തിന് ഒരൊറ്റ വെട്ട് കൊടുത്തു. ഹെൽമറ്റ് ഇല്ലാത്തതിന്റെ ഗുണം പയ്യൻ ശരിക്കും അറിഞ്ഞു; അവൻ അവിടെത്തന്നെ സ്പോട്ടിൽ തീർന്നു. ഇതുകണ്ട് ഭയന്നുവിറച്ച സാമുവൽ, സന്ധ്യ, സുരേഷ് എന്നിവരെ ആദർശൻ ആയുധം കാട്ടി ഭീഷണിപ്പെടുത്തി തന്റെ കാടിന് നടുവിലുള്ള തറവാട്ടിലേക്ക് നടത്തിച്ചു കൊണ്ടുപോയി. പോകുന്ന വഴിയിൽ ആദർശൻ ഒരു കാട്ടുപന്നിയുടെ ഒച്ചയുണ്ടാക്കി അവരെ പേടിപ്പിച്ചു കൊണ്ടിരുന്നു. ……. തറവാട്ടിൽ എത്തിയപ്പോഴാണ് പിള്ളേർക്ക് കാര്യം മനസ്സിലായത് അത് ഒരു സാധാരണ വീടല്ല മറിച്ച് സൈക്കോയായ ആദർശന്റെ താവളമാണ് എന്ന്. ഉമ്മറത്ത് ദാ കിടക്കുന്നു എസ്‌.ഐ ബിജുവിന്റെ ചോര പുരണ്ട തൊപ്പിയും നക്ഷത്രങ്ങളും! അകത്തെ മുറിയിൽ നിന്ന് ഭീകരമായ *ഡ്രുർർർർ* എന്ന ശബ്ദത്തോടെ ആദർശൻ തന്റെ പുതിയ അറക്കവാൾ വെച്ച് ആ ബുള്ളറ്റ് ഫ്രീക്കൻ പയ്യന്റെ ബോഡി കഷ്ണങ്ങളായി വെട്ടിപ്പൊളിക്കാൻ തുടങ്ങി. ആ ശബ്ദം കേട്ട് സുരേഷ് പാന്റിൽ മൂത്രമൊഴിച്ചു. ഈ സമയത്ത് കാപ്പിത്തോട്ടത്തിൽ ബോധം വീണ റെക്സി ചോരയൊലിപ്പിച്ചു കൊണ്ട് എഴുന്നേൽക്കുകയും പ്രാണരക്ഷാർത്ഥം മെയിൻ റോഡിലേക്ക് ഓടുകയും ചെയ്തു. വഴിയിൽ വെച്ച് ഒരു പഴയ ലോറി നിർത്തിച്ച് അതിലുണ്ടായിരുന്ന തമിഴ്നാട്ടുകാരനായ ഡ്രൈവറോട് കാര്യം പറഞ്ഞു. "അണ്ണാ, അങ്കെ കൊല നടക്കത്! എൻ ഫ്രണ്ട്സെ കാപ്പാത്തങ്കെ!" റെക്സി കരഞ്ഞു. സുഹൃത്തുക്കളെ രക്ഷിക്കാൻ റെക്സിയും ആ ലോറി ഡ്രൈവറും കൂടി ധൈര്യം സംഭരിച്ച് തറവാട്ടിലേക്ക് പാഞ്ഞു വന്നു. ലോറി ഡ്രൈവറുടെ കയ്യിൽ ഒരു നാടൻ തോക്കുണ്ടായിരുന്നു. എന്നാൽ തറവാട്ടിനുള്ളിൽ അപ്പോൾ ആദർശൻ തന്റെ ക്രൂരവിനോദങ്ങൾ തുടങ്ങിയിരുന്നു. അവൻ സുരേഷിനെ ഒരു വലിയ കസേരയിൽ കെട്ടിയിട്ടു സാമുവൽ പേടിച്ച് അടുക്കള വാതിലിലൂടെ പുറത്തേക്ക് ഓടിയപ്പോൾ മുറ്റത്ത് പണ്ട് കാട്ടുപന്നിയെ പിടിക്കാൻ ഗീത വെച്ചിരുന്ന വലിയൊരു ഇരുമ്പ് കെണിയിൽ അവന്റെ കാൽ കുടുങ്ങി. അസ്ഥി തകരുന്ന ശബ്ദത്തോടെ സാമുവൽ നിലവിളിച്ചു. ആ ശബ്ദം കേട്ട് അകത്തിരുന്ന ആദർശൻ സന്തോഷം കൊണ്ട് ഒരു ആട്ടിൻകുട്ടിയുടെ ശബ്ദത്തിൽ ചിരിച്ചു! സന്ധ്യ വീടിന്റെ ജനൽ വഴി ചാടി രക്ഷപ്പെടാൻ നോക്കിയപ്പോൾ മുകളിൽ ഒളിച്ചിരുന്ന ആദർശൻ വലിയൊരു മീൻ പിടിക്കുന്ന ചൂണ്ടയെടുത്ത് അവളുടെ തോളിൽ കോർത്ത് അവളെ വീട്ടിനുള്ളിലേക്ക് വലിച്ചിട്ടു. ഒരു വലിയ മീനിനെ പിടിക്കുന്നതുപോലെ അവൻ അവളെ മുകളിലേക്ക് ഉയർത്തി. ….. ഇതിനിടയിലാണ് ഹെൽത്ത് ഇൻസ്പെക്ടർ നിസാർ കശാപ്പുശാല പൂട്ടിച്ചതിന്റെ ബാക്കി പേപ്പർവർക്കുകളുമായി ആദർശന്റെ വീട് അന്വേഷിച്ച് അവിടെയെത്തുന്നത്. ഒരു സർക്കാർ ഉദ്യോഗസ്ഥന്റെ കടമ കൃത്യമായി നിർവ്വഹിക്കാൻ വന്നതായിരുന്നു പാവം. വീട്ടിൽ നിന്നും കേൾക്കുന്ന പലതരം മൃഗങ്ങളുടെയും മനുഷ്യരുടെയും നിലവിളികൾ കേട്ട് നിസാർ ഞെട്ടിവിറച്ചു. റെക്സിയും ലോറി ഡ്രൈവറും ഇതേസമയം അകത്തേക്ക് ചാടിക്കയറി. ലോറി ഡ്രൈവർ തന്റെ കയ്യിലുണ്ടായിരുന്ന നാടൻ തോക്കെടുത്ത് ആദർശന്റെ നേരെ ചൂണ്ടി എല്ലാവരെയും വിടാൻ ആവശ്യപ്പെട്ടു: "യോവ്! കത്തിയെ കീഴെ പോട്! ഇല്ലെണ്ണാ സുട്ടുടുവേൻ!" പക്ഷേ ആദർശൻ ഒട്ടും ഭയന്നില്ല. അവൻ തന്റെ ബ്രാൻഡഡ് അറക്കവാൾ ഒറ്റ വലിക്ക് സ്റ്റാർട്ടാക്കി. ഭീകര ശബ്ദത്തോടെ ആദർശൻ ലോറി ഡ്രൈവറെ ഒരൊറ്റ അറുപ്പ് അറുത്തപ്പോൾ ചോര തെറിച്ച് നിസാറിന്റെ മുഖത്തും വീണു. നിസാർ പേടിച്ച് വിറച്ച് അവിടെയുള്ള ഒരു വലിയ തേക്ക് അലമാരയ്ക്കുള്ളിൽ ഒളിച്ചു. താൻ പൂട്ടിച്ച കശാപ്പുശാലയേക്കാൾ വലിയൊരു അറവുശാലയിലാണ് താൻ ഇപ്പോൾ നിൽക്കുന്നത് എന്ന് നിസാർ മനസ്സിലാക്കി. ആദർശൻ അടുത്തതായി സുരേഷിനെ ഒരു വലിയ മരമേശയിൽ കിടത്തി കെട്ടി തന്റെ മൂർച്ചയുള്ള കത്തി ഉപയോഗിച്ച് സുരേഷിന്റെ മുഖത്തെ തൊലി മാത്രം പച്ചയോടെ ചെത്തിയെടുത്തു. സുരേഷിന്റെ നിലവിളി കട്ടപ്പനയിലെ മഞ്ഞിനെപ്പോലും ഭേദിച്ചുകൊണ്ട് കടന്നുപോയി. എന്നിട്ട് ആദർശൻ ആ ചോരയൊലിക്കുന്ന തൊലി സ്വന്തം മുഖത്ത് ഒരു ഫേഷ്യൽ മാസ്ക് പോലെ വെച്ചുപിടിപ്പിച്ചു. "ഇപ്പൊ എങ്ങനെയുണ്ട്? ഞാൻ സുരേഷിനെപ്പോലെ സുന്ദരനായില്ലേ?" എന്ന് ചോദിക്കുന്നതുപോലെ അവൻ തന്റെ വലിയ കണ്ണുകൾ റെക്സിക്ക് നേരെ തിരിച്ചു. റെക്സി ഇതെല്ലാം കണ്ട് പേടിച്ച് നിലവിളിച്ചുകൊണ്ട് സന്ധ്യയെ തിരഞ്ഞ് മുകളിലത്തെ നിലയിലേക്ക് ഓടി എങ്കിലും താഴത്തെ ഡൈനിംഗ് ടേബിളിൽ മുഖംമൂടി ധരിച്ച ആദർശൻ ഒരു ഭീകരമായ ഡിന്നർ ഒരുക്കിയിരുന്നു. അവിടെ സന്ധ്യയെ കസേരയിൽ കെട്ടിയിരുത്തിയിട്ടുണ്ടായിരുന്നു. അവളുടെ മുന്നിൽ പ്ലേറ്റിൽ ആ ബുള്ളറ്റ് ഫ്രീക്കന്റെ കൈവിരലുകൾ വറുത്തു വെച്ചിട്ടുണ്ടായിരുന്നു! റെക്സി നോക്കിനിൽക്കേ ആദർശൻ തന്റെ അറക്കവാൾ കൊണ്ട് സന്ധ്യയുടെ തൊണ്ട ഒരൊറ്റ വലിക്ക് മുറിച്ചു കളഞ്ഞു. റെക്സിക്ക് ഭയം മാറി കടുത്ത ദേഷ്യം വന്നു. അവൾ മരിക്കാൻ തയ്യാറായിരുന്നു. അവൾ ഡൈനിംഗ് ടേബിളിലിരുന്ന ഗീതമ്മ ഉണ്ടാക്കി വെച്ച പഴയ ഇഞ്ചി അച്ചാർ കുപ്പിയിലെ വലിയൊരു സ്റ്റീൽ സ്പൂൺ എടുത്ത് ആദർശന്റെ പുറകിൽ കുത്തിയിറക്കി. എന്നിട്ട് ജനൽ വഴി താഴേക്ക് ചാടി. വഴിയിൽ വെച്ച് കാലിലെ കെണി സ്വയം വലിച്ചുപൊട്ടിച്ച് ചോരയൊലിപ്പിച്ചു നിന്ന സാമുവൽ ഒരു വടിയെടുത്ത് ആദർശനെ തല്ലാൻ നോക്കിയെങ്കിലും, പുറകിൽ സ്പൂണും കുത്തിവെച്ച് ഓടിവന്ന ആദർശൻ സാമുവലിനെയും തന്റെ അറക്കവാളിന് ഇരയാക്കി മാറ്റിക്കളഞ്ഞു. സാമുവലിന്റെ ശരീരവും അവിടെത്തന്നെ നിശ്ചലമായി. ……. റെക്സി കശാപ്പുശാലയിലെ പഴയ മാനേജരുടെ അംബാസഡർ കാറിന്റെ താക്കോൽ തറയിൽ കിടന്ന് കിട്ടിയത് സംഘടിപ്പിച്ചു. വണ്ടിയിൽ കയറി റിവേഴ്സ് അടിച്ച് മെയിൻ റോഡിലേക്ക് പാഞ്ഞുപോയി. വഴിയിൽ കനത്ത മഞ്ഞായിരുന്നു. വിൻഡ്ഷീൽഡ് വൈപ്പർ പോലുമില്ലാത്ത ആ പഴയ കാറിൽ അവൾ മുന്നോട്ട് പാഞ്ഞു. ദൂരെ ഒരു ഒഫീഷ്യൽ ഹൈവേ പോലീസ് ജീപ്പ് ലൈറ്റിട്ട് കിടക്കുന്നത് കണ്ട് രക്ഷപ്പെട്ടു എന്ന് കരുതി അവൾ ആശ്വാസത്തോടെ വണ്ടി പതുക്കെയാക്കാൻ നോക്കി. "ദൈവമേ, ഞാൻ രക്ഷപ്പെട്ടു!" അവൾ ആശ്വസിച്ചു. പക്ഷേ കാറിന്റെ ബാക്ക് സീറ്റിൽ ഒളിച്ചിരുന്ന ആദർശൻ പെട്ടെന്ന് എഴുന്നേറ്റ് തന്റെ ചോര പുരണ്ട അറക്കവാൾ ഒന്നു കൂടി ആഞ്ഞു വലിച്ച് സ്റ്റാർട്ടാക്കി സീറ്റിലൂടെ റെക്സിയുടെ തോളിൽ ആഴ്ന്നിറക്കി. വേദനയും ഭയവും കൊണ്ട് റെക്സിയുടെ കാൽ ബ്രേക്കിന് പകരം ആക്സിലറേറ്ററിൽ അമർന്നു. നിയന്ത്രണം വിട്ട അംബാസഡർ കാർ നേരെ പാഞ്ഞുപോയി റോഡിൽ ചായ കുടിച്ചുകൊണ്ട് ഡ്യൂട്ടിയിലുണ്ടായിരുന്ന ആ രണ്ട് ഒറിജിനൽ ഹൈവേ പോലീസുകാരെയും ഇടിച്ചു തെറിപ്പിച്ചു. കാർ ഒരു വലിയ ആൽമരത്തിലിടിച്ച് നിന്നു. റെക്സിയും പോലീസുകാരും സംഭവസ്ഥലത്തു തന്നെ മരിച്ചു. കാറിന്റെ റേഡിയോയിൽ അപ്പോൾ ഒരു പഴയ നാടൻ പാട്ട് പ്ലേ ചെയ്യുന്നുണ്ടായിരുന്നു. …… പിറ്റേന്ന് രാവിലെ തറവാട്ടിലെ ആ ഇരുണ്ട മുറിയിലെ അലമാര പതുക്കെ തുറന്നു. അതിനുള്ളിൽ നിന്നും പേടിച്ച് തൂറി, വിയർത്തു കുളിച്ച് ഹെൽത്ത് ഇൻസ്പെക്ടർ നിസാർ പുറത്തേക്കിറങ്ങി.തറയിലാകെ ചോരയും എല്ലിൻകഷ്ണങ്ങളും മനുഷ്യമാംസത്തിന്റെ അവശിഷ്ടങ്ങളും മാത്രം അവശേഷിച്ചിരുന്നു. ഡൈനിംഗ് ടേബിളിൽ ഇഞ്ചി അച്ചാറിന്റെ കുപ്പി ഒഴിഞ്ഞുകിടന്നു.നിസാർ ജീവനും കയ്യിലെടുത്ത് ജനൽ വഴി പുറത്തേക്ക് ചാടി വനത്തിലേക്ക് ഓടിമറഞ്ഞു. ആദർശൻ അപ്പോഴും തന്റെ ചോരപുരണ്ട അറക്കവാളും തോളിൽ വെച്ച്, സുരേഷിന്റെ മുഖം മാസ്കാക്കി ധരിച്ച്, കട്ടപ്പനയിലെ വെളുത്ത മഞ്ഞിലൂടെ വളരെ ശാന്തനായി, ഒരു സിനിമയിലെ നായകനെപ്പോലെ മിക്സി കറങ്ങുന്ന ഒച്ചയും മൂളി നടന്നുപോവുകയായിരുന്നു. അടുത്ത കശാപ്പുശാല എവിടെയാണെന്ന് അവൻ അന്വേഷിക്കുകയാവാം. …… End